Madalena Hanjam. Foto espesiál

DILI (TATOLI)–Prezidente Cruz Vermella Timor-Leste (CVTL), Madalena Hanjam Costa Soares deklara, atividade hirak ne’e mak hanesan halo prevensaun ba dezastre Naturais, doasaun ran no partisipa iha dezenvolvimentu hanesan oinsá atu hare bee mós ba komunidade sira.

“Ami mai fó introdusaun ba Primeiru-Ministru no ko’alia mós konaba atividade saida mak Cruz Vermella halo iha tempu badak, nune’e mós iha tempu naruk oinsá mak Cruz Vermella bele servisu hamutuk governu liuhosi ministériu relevantes mak liga ho atividade instituisaun ne’e”, Madalena Hanjam informa ba jornalista sira iha Palásiu Governu, hafoin hasoru Primeiru Ministru iha Palásiu Governu , Sesta (28/9).

Nia hatutan, Cruz Vermella mós sei halo treinamentu ba instituisaun hotu konaba primeiru sokorru no mobiliza voluntáriu komunidade hotu atu partisipa iha doasaun ran atu salva ema nia moris, nune’e kompete hotu iha asaun umanitária ba komunidade.

Ba prevensaun dezastre naturais nian, Cruz Vermelha sei hato’o karta hanesan sensibilidade ida atu fó hanoin ba estadu no ministériu relevante, no komunidade tomak oinsá mak udan atu monu rai ita bele halibur sasán fo’er sira tau iha nia fatin para bee mai, labele lori sasán fo’er sira estraga fali ita nia ambiente.

“Bainhira sasán fo’er sira la rekolla didi’ak, entaun susuk no lalar komesa barak no sei mosu moras oin-oin ba komunidade sira, liu-liu labarik sira mak risku ba moras hanesan dengue,” Tuir eis Ministra Saúde ne’e esplika.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here