Xefe Estadu Maior Jenerál F-FDTL, Lere Anan Timur, bainhira halo deskursu iha toma pose Vise Xefe Estadu Maior Jenerál F-FDTL, Falur Rate Laek, ne’ebé hala’o iha Palásiu Prezidensiál, segunda (1/10/2018). Imajen António Gonçalves

DILI, (TATOLI) – Xefe Estadu Maior Jenerál FALINTIL-Forsa Defeze Timor-Leste (F-FDTL), Lere Anan Timur, hateten ema ida labele kestiona kapasidade no antesedénsia Vise  Xefe Estadu Maior Jenerál F-FDTL, Falur Rate Laek.

“Se ita dúvida Vise Xefe Estadu Maior Jenerál F-FDTL nia kb’it no antesedénsia, lahatene ita atu ukun rai ne’e oinsá”, Lere dehan liuhusi ninia diskursu iha seremónia toma pose ba Brigadeiru Jenerál F-FDTL, Falur Rate Laek, ne’ebé asumi kargu Vise Xefe Estadu Maior Jenerál iha Palásiu Prezidente Nicolau Lobato, Bairru Pité, segunda ne’e.

Tuir Lere kargu ne’ebé Vise Xefe Estadu Maior Jenerál F-FDTL asumi, kna’ar ida ne’ebé la’ós kama’an, tanba sei tau matan ba administrasaun F-FDTL no serbisu sira seluk ne’ebé liga ba dezenvolvimentu instituisaun F-FDTL.

Nia apela ba brigadeiru jenerál na’in haat hanesan Sabica Besi Kulit, Aluc, Maunana no Falur Rate Laek atu hamutuk ho nia lori instituisaun ne’e ba oin. Katak, kontinua haburas no hametin espíritu dedikasaun no determinasaun hanesan funu durante tinan 24 nia laran atu hametin unidade nasionál.

“Ha’u husu ba Vise Xefe Estadu Maior Jenerál F-FDTL atu ita na’in rua serbisu hamutuk ho didi’ak. Ha’u presiza ita-boot nia apoiu hanesan mós Sabica, Maunana no Aluc atu ita lori ita nia instituisaun ne’e ba oin”, afirma eis líder gerileiru ne’e.

Nia kompromete sei foti aas liu interese Estadu, nasaun no povu tanba interese ida ne’e maka sira defende iha luta ba libertasaun nasionál.

Iha biban ne’e, Lere husu ba família atu apoiu, tanba família mós fatór determinante ba ema hotu-hotu atu bele dezenvolve ninia serbisu ba Estadu no nasaun.

Xefe Estadu Maior Jenerál F-FDTL mós propoin ona ba Governu atu indijita Xefe Estadu Maior F-FDTL hodi troka vise Xefe Estadu Jenerál Falur nia fatin, tanba nia (Falur) maka uluk asumi Xefe Estadu Maior no probabilidade Prezidente Repúblika sei fó tomada pose iha semana oin.

Nia informa koronél ida maka sei asume fali kargu Xefe Estadu Maior maibé nia rejeita fó sai identidade hosi koronél ne’e tanba seidauk hetan tomada pose.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here