Taxi Argo. Foto/Google.

DILI, (TATOLI) – Diresaun Nasionál Transporte Terrestre (DNTT) Ministériu Transporte no Komunikasaun legaliza de’it tipu taxi rua mak kinur no argo, maibé ba futuru sei dezenvolve tan iha área transporte ne’ebé di’ak liu hanesan agora daudaun Argo ne’e.

Xefe Departamentu Veíkulu DNTT, Nelson Sequeira Martins, hatete tanba taxi kinur ne’e iha tempu uluk kedas kuandu ukun-án maluk sira ne’ebé iha kbiit hakarak investe iha área ida ne’e, sira trata dokumentu no DNTT fó, mas futuru DNTT só autoriza maka taxi Argo.

“DNTT sei lasimu ona taxi ne’ebé indivíduu. Simu hanesan kompañia ba maluk sira ne’ebé hakarak bele halo kompañia ida na’in-lima, tau sasán hamutuk taxi sira ne’ebé tuir kritéria DNTT fó depois bele mai legaliza”, Nelson hatete iha Balide ohin.

Nia hatutan kona-ba taxi sira ne’ebé sei sirkula iha Dili laran, maibé balun iha kondisaun ne’ebé ladún di’ak ona, DNTT esforsu hodi monta mákina inspesaun iha Komoro ba transporte sira ne’ebé fó prioridade liu ba transporte públiku sira..

“Lisensa DNTT fó tinan ida sira renova, sira halo inspesaun mak orsida sei determina. Iha ne’ebá sei tama iha mákina maka koko karreta nia kondisaun, se ladi’ak rekomenda mai DNTT sei lafó tan lisensa, balun ne’ebé ladi’ak DNTT iha opsaun rua, bá hadi’a tiha depois mai fali mákina koko, se mákina inspesaun fó rezultadu ladi’ak tenke hapara lisensa”.

Enkuantu ba karreta sira ne’ebé kondisaun ladi’ak, maibé sei halo atividade DNTT sei koopera ho polísia para haree.

“DNTT sei fó oportunidade ba sira katak ita-boot sira hanesan timoroan hakarak investe iha área ida ne’e hadi’ak karreta no DNTT loke hela ba públiku sira ne’ebé hakarak investe iha área transporte liuhusi taxi, mas ho modelu ne’ebé DNTT define, la’ós modelu hanesan Grab ka Taxi Lais”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here