Foto/Google.

DILI, (TATOLI) – Xefe Departamentu Veíkulu Diresaun Nasionál Transporte Terrestre (DNTT) Ministériu Transporte no Komunikasaun, Nelson Sequeira Martins, hatete lei la autoriza atu kompañia husi Lais Dijitál ne’ebé investe iha Taxi online Lais funsiona atividade iha Timor-Leste.

“Kompañia Lais Dijitál halo karta ida dirije ba ministru depois enkamiña mai diresaun atu haree ba baze legál liga ba sirkulasaun transporte públiku iha Timor-Leste, entaun DNTT halo avaliasaun liga ba lei ne’ebé estabelese, katak iha ne’e DNTT uza diploma ministeriál 2/2003 ho dekretu lei 2003 nian sobre baze sistema transporte públiku, entaun iha ne’ebá lafó dalan atu ita hamosu kualkér tipu transporte públiku ne’ebé maka liuhusi grupu”, Nelson dehan iha Balide, ohin.

Foto Facebook DNTT

Nia esplika tuir lei karreta hotu-hotu tenke liuhusi DNTT no hetan xapa matríkula ne’ebé maka Estadu define ona kona-ba transporte públiku sira ne’e. “Agora kona-ba Taxi Lais sira halo pedidu mai DNTT, ami esplika lei la fó atu sira halo operasaun no sira hatene ona”.

Maski empreza ne’e hetan ona lisensa ba aplikasaun husi Servisu Rejistrasaun no Verifikasaun Emprezariál (SERVE), maibé atu halo atividade ida ne’e kompeténsia ba Ministériu Transporte no Komunikasaun liuliu DNTT.

“Tanba ne’e maka ami dehan labele no haree ba kondisaun liuliu Dili nian seidauk bele, ne’ebé diresaun fó opsaun rua ba sira ida, sira hakarak bele hatama taxi Argo, mai iha DNTT hatama pedidu loke kompañia foun depois ita halo estudu no bele konsidera, segundu, tanba sira hetan lisensa husi SERVE bele halo sira-nia produtu ne’e ho taxi ita-nian sira ne’ebé iha ona ne’e, serbisu hamutuk ho timoroan sira ne’ebé iha ona taxi bele rejista ba sira-nia membru, mas tenke informa mai DNTT katak taxi sira kinur ho xapa no naran hanesan ne’e agora sai ona membru ba Lais Dijitál”, sujere.

Atu nune’e hanesan produtu ida para fasilita de’it maluk ne’ebé iha taxi kinur sira ne’e bainhira ema hakarak uza lalais, enkuantu nia mós tenke prienxe rekizitu empreza nian, hadi’a karreta nia kondisaun, kadeira, hatais di’ak para halo atendimentu ba públiku di’ak nune’e ema bele uza.

Maibé atu uza Taxi Lais ne’e komesa husi sesta semana kotuk (28/9) labele ona halo atividade, bainhira kontinua maka nia konsikuénsia DNTT koopera ho Polísia Tránzitu sei halo atuasaun.

Tanba ne’e DNTT hakarak fó hatene ba públiku katak Taxi Lais labele ona halo operasaun, se kontinua maka konsidera ilegál no nu’udar sidadaun timoroan bainhira ema estranjeiru maka halo atividade ne’e husu atu koopera no hato’o informasaun para halo atuasaun atu labele afeta ba maluk sira ne’ebé agora halo atividade iha transporte públiku nian liuliu taxi.

“Konsikuénsia mak foin daudaun ami halo atuasaun ba taxi online Xina sira, ema estranjeiru mai uza. Ami foufoun ladún kontente tanba maluk timoroan barak serbisu hela iha TP (Timor Plaza) hatene hela, mas lakohi mai informa só balun ne’ebé iha hanoin di’ak serbisu iha transporte públiku mai informa no ami halo atuasaun no ka’er duni ema ne’e no nia tama ona prizaun preventiva, hein prosesu ne’e la’o”.

Kona-ba atividade empreza ne’e rasik DNTT lahatene dezde bainhira sira halo operasaun iha Timor-Leste, maibé komesa agora bandu ona atu labele halo sira-nia atividade.

 Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here