Dekanu FMSS, João Martins. Foto Tatoli: Egas Cristovão

DÍLI, (TATOLI)-Universidade Nasionál Timor Lorosa’e (UNTL), liliu Fakuldade Medisina Siénsia no Saúde (FMSS) liuhusi dekanu João Martins, sujere ba estudante FMSS sira atu gasta tempu ba estuda duke envolve  atividade promove fa’an aimoruk herbál liuhusi online.

“Ha’u sujere ba estudante sira tenke hatene didi’ak. Di’ak liu gasta tempu ba estuda atu bele termina kursu lalais duke envolve iha atividade sira ne’ebé mak bele afeta sira-nia estudu,” dehan dekanu João Martins ba jornalista sira iha Kampus FMSS-eis SPK (Sekolah Pendidikan Keperawatan), Lahane-Díli, iha sesta lorokraik (28/09).

Dekanu ne’e rekoñese katak nia parte seidauk iha informasaun kona-ba estudante FMSS envolve fa’an ai-moruk herbál HWI tanba ne’e sei presiza estuda para hatene.

Nune’e mós, nia konsidera katak estudante FMSS ne’ebé fa’an aimoruk herbál tanba kestaun marketing (merkadória) ne’ebé boot tebes, ne’ebé influénsia ema hotu, inklui estudante balun, mezmu dalaruma sira la iha informasaun ne’ebé klaru no kompletu kona-ba medikamentu herbál, medikamentu tradisionál ne’ebé mak ema promove.

“Talvez sira laduun hetan informasaun ne’ebé kompletu, entaun talvez sira mós monu ba tentasaun para bele fa’an aimoruk nee, folin lalais,” konsidera dekanu FMSS, João Martins perante profisionál komunikasaun sosiál sira hodi insiste nafatin estudante FMSS atu estuda.

Antes ne’e, governu liuhusi Ministériu Saúde (MS) alerta ba públiku eh pasiente sira atu labele fiar aimoruk herbal, ne’ebé dadaun ne’’e fa’an iha fatin hothotu. “Aimoruk herbál só halakon sintoma moras, liu ida ne’e, komesa moras fila fali. Tanba ne’e labele fiar,” Vise-Ministru Saúde, Bonifácio Maukoli dos Reis informa ba Ajénsia TATOLI, iha uma fukun Parlamentu Nasionál.

Nia husu ba públiku tomak, kuandu moras ona tenke hakat ba sentru saúde ne’ebé besik hodi hetan konsulta husi médiku espesialista.“Sira ne’ebé fa’an aimoruk ne’e la’ós médiku atu hatene ema moras hodi bele kurativa ho aimoruk, só médiku mak bele fó reseita,” nia enkoraja.

Tanba ne’e, governu iha polítika atu halo intervensaun aimoruk herbál ne’ebé fa’an iha farmásia. Liliu, tenke obedese ba padraun ne’ebé define husi Ministériu Saúde.

Iha fatin ketak, SERVE (Servisu Rejistrasaun no Verifikasaun) husu onestidade individuál fa’an aimoruk herbal atu rejistu.

Diretór SERVE, Florêncio Sanches hateten, fa’an aimoruk herbál ho individualmente konsidera hanesan atividade ekonómika ida no lei fó dalan, maibé atu halo negósiu ida ne’e presiza rejista iha SERVE.

Tanba ne’e husu onestidade individuál ne’ebé halo atividade ne’e atu rejistu, nune’e bele hetan sertifikadu.

“Individu ne’e lei fó dalan, uluk liu antes 2012 ne’e labele tanba tenke sai tiha kompañia. Tanba ne’e, iha tinan lima ba kotuk ita iha dekretu lei foun ne’ebé fó dalan ba individu sira ne’ebé hakarak halo negósiu atu hetan buat ida naran ENIN-Empresa em Nome Individual,” afirma Florêncio, iha edifísiu Alfándega (Eis-ministériu Finansa).

Bainhira ida ne’e mak ema fa’an la rejista, sei hetan koima dolár 500 no ba empreza mak sei kona dolár 5000. “Duke imi kona dolár 500 ne’ebé aplika ba imi diak liu mai SERVE para rejista gratuita, hetan surat-tahan ida kapas,” katak diretór SERVE ne’e.

Notísia relevante; http://www.tatoli.tl/2018/09/labele-fiar-ai-moruk-herbal-tanba-la-kura-moras/

http://www.tatoli.tl/2018/09/serve-husu-onestidade-individual-faan-ai-moruk-herbal-atu-rejistu/

 Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here