Uniaun Europeia no Camões, I.P. Kontinua Reforsa Kapasidade Timoroan Kombate Korupsaun

0
50

DÍLI, (TATOLI)-Uniaun Europeia no Camões, I.P. kontinua apoia Timor-Leste, liuhusi formasaun ba profisionál sira hodi reforsa kapasidade nasaun nian ba kombate korupsaun, fase osan no tráfiku droga sira.

Kuaze juíz, prokudarór, polísia investigasaun kriminál, tékniku unidade formasaun finanseira no investigadór sira husi Komisaun Anti Korupsaun (KAK) na’in 25 partisipa iha segunda edisaun formasaun, ne’ebé promove husi Projeto de Apoio à Consolidação do Estado de Direito nos PALOP no Timor-Leste (PACED). Formasaun ne’e hahú ohin, segunda (24/09).

“Apoia husi autoridade timoroan sira no finansia husi Uniaun Europeia no Camões, I.P. Inisiativa ne’e hakarak reforsa koñesimentu iha área prevensaun no kombate kriminalidade ekonómiku-finanseira no tráfiku droga,” haktuir komunikadu konjunta Uniaun Europeia no Camões, I.P. diriji ba Ajénsia TATOLI, ohin.

Komunikadu ne’e mós refere katak primeira edisaun ba atividade hanesan ne’e hala’o ona iha 2017. Programa formasaun ne’e hala’o husi espesialista timoroan na’in hitu, ne’ebé integra iha bolsa autónoma formadór nian iha área penál, kria iha abrigu PACED.

Ho apoiu no tutoria Sentru Estudu Judisiáriu no Eskola Polísia Judisiária Portugal, konteúdu sira foka liu ba instrumentu legál sira, administrativu no prosesuál sira, iha metodolojia sientífika no dezenvolvimentu mekanizmu identifikasaun no detesaun ne’ebé adekuada liu ba tratamentu kazu korupsaun, brankeamentu kapitál no kriminalidade organizada, liliu iha tráfiku droga nian.

Sira ne’ebé hetan benefísiu ba formasaun, ne’ebé hala’o husi espesialista timoroan sira mak formandu na’in 25 ne’ebé institusaun nasionál ne’ebé mak serbisu ho projetu ne’e hahú 2015, liliu Ministériu Justisa, Tribunál Rekursu, Prokuradória Jerál Repúblika, Polísia Sientífika no Investigasaun Kriminál no Unidade Informasaun Finanseira.

Iha ámbitu programa kapasitasaun ne’e, PACED hala’o ona iha nasaun parseiru neen ba projetu ne’e, asaun formasaun nasionál 26, ne’ebé partisipa husi formandu na’in 389. Iha edisaun dahuluk ba asaun ne’e iha Timor-Leste, ne’ebé hala’o iha 2017, profisionál na’in 18 mak uza ona sira-nia kompeténsia sira ne’ebé mak reforsa ona iha domíniu ida ne’e.

Entretantu, PACED moris husi parseria Uniaun Europeia no PALOP ho Timor-Leste, ne’ebé nia objetivu mak halo afirmasaun no konsolidasaun ba estadu direitu nasaun sira nian, nomós halo prevensaun no luta kontra korupsaun, brankeamentu kapitál no kriminalidade organzida, no partikularmente ba tráfiku.

Nia durasaun mak to’o dezembru 2019, ho orsamentu euro milaun 8, 4 (milaun hitu finansia husi Uniaun Europeia no milaun 1, 4 husi Camões, I.P.). Milaun 8,05 administra diretamente husi Camões-Institutu Kooperasaun no Língua, ne’ebé intervensaun mak haree ba iha fortalesimentu kapasidade institusionál sira no atualizasaun prosedimentu operasionál sira nomós iha reforsu ba kooperasaun rejionál PALOP (Países Africanos da Língua Portuguesa) no Timor-Leste.

Jornalista: Rafy Belo

Editór : Manuel Pinto

HUSIK IDA HATÁN