UNDIL Promove Abilidade Estudante Liuhusi Feira

0
97
Vizitante feira rona hela esplikasaun husi estudante UNDIL kona-ba oinsa halo perfurasaun ba mina. Foto TATOLI: Rafy Belo

DILI, (TATOLI) – Universidade Dili (UNDIL), liuhusi planu no programa senadu estudantil Fakuldade Enjeñária, ohin lansa ‘Feira ba Siénsia no Abilidade’ ho tema ‘Haburas Siénsia no Teknolojia mak nu’udar Pasu Úniku ba Dezenvolvimentu Nasionál’.

Feira ne’e partisipa mós husi estudante sekundáriu sira ho objetivu kapasita, mentaliza no promove estudante sira-nia abilidade hodi prepara futuru jerasaun ne’ebé pró-ativu, kreativu, inovativu no transformativu, lori progresu no dezenvolvimentu ba povu no rai Timor-Leste.

Nune’e mós transmite informasaun ba malu hodi hametin lasu amizade entre estudante sira iha UNDIL nomós ho estudante sekundáriu.

“Aplika teória no esperiénsia ekstra-kurikulár hodi hasa’e kualidade no koñesimentu universitáriu liuhusi eventu importante ne’e nomós atividade seluk”, hateten senadu Fakuldade Enjeñária, Arlindo Ximenes, iha kampus UNDIL, Mascarenhas, ohin.

Tuir nia mundu ohin loron globalizadu, ejize preparasaun ne’ebé di’ak liu no kontinua iha kontextu dezenvolvimentu nasionál. “Ejize rekursu umanu ne’ebé preparadu no kualidade”.

Iha fatin hanesan, dekanu Fakuldade Enjeñária, Agapito Manuel Fátima, hatete Fakuldade Enjeñáriu sai sentru ba dezenvolvimentu siénsia no teknolojia nomós hasa’e kualidade rekursu umanu ne’ebé prestiozu, independentemente, profisionál, hodi kontribui ba dezenvolvimentu nasionál.

“Ho nune’e fakuldade hakarak prodús iha área enjeñária ne’ebé mak kompetente ho nia espesifidade”, dehan Agapito Fátima.

Nia akresenta atividade ne’e, fakuldade hakarak hatoman án hodi pró-ativu iha prosesu kurikulár, halo estudante kapasita án atu sai jerasaun ne’ebé kualifikadu.

Nia fiar katak ho apoiu forsa ema no grupu nian; envolve entidade hothotu inklui governu, sosiedade sivil, igreja, instituisaun privada no inan-aman atu fó kbiit liután ba aspetu edukasaun iha Timor-Leste.

“Nu’udar dekanu ha’u hakarak konvida entidade hothotu, liliu ba dirijente Universidade Dili nomós governu atu tulun fluénsia ba atividade ne’e, nune’e estudante sira hotu bele partisipa, hasa’e sira-nia skill (abilidade), promove sira-nia án ba futuru”, konvida dekanu.

Entretantu feira ne’e sei hala’o durante loron rua, hahú ohin to’o sábadu (22/9) ho tipu atividade kurikulár oioin hanesan semináriu, espozisaun ba produtu, kompetisaun arte no pintura, diskursu públiku nomós sertame.

Feira ne’e loke husi Ministru Obras Públika, Salvador Pires. Durante diskursu, governante ne’e hateten ensinu superiór iha kualidade importante tolu iha prosesu aprendijazen.

“Ida mak kapasidade hanoin krítiku, hanoin solusiona ka buka solusaun ho maneira ne’ebé di’ak liu atu atinje rezultadu ida, segundu analítiku; halo analiza problema ho opsaun oioin, nune’e iha opsaun ida rezolve problema no ikus liu ne’e mak abilidade atu rezolve problema”, esplika governante ne’e.

Feira ne’e partisipa alende universitáriu sira iha UNDIL, inklui estudante sekundáriu nomós konvidadu sira.

Feira ne’e organiza tanba hetan husi apoiu estudante Fakuldade Enjeñária, Departamentu Téknika no Indústria ho Departamentu Petróleu, patrosíniu mós husi Loja Yang, Timor Telecom, Loja Globus, Lotária Amizade no Telkomcel.

Jornalista: Rafy Belo

Editora: Rita Almeida

HUSIK IDA HATÁN