SEFOPE Sei Investe Iha Setór Privadu

0
136
Sekretáriu Estadu Formasaun Profisonál no Empregu (SEFOPE), Julião da Silva. Foto/SEFOPE.

DILI, (TATOLI) – Sekretáriu Estadu Formasaun Profisonál no Empregu (SEFOPE), Julião da Silva, hatete polítika SEFOPE nian maka sei investe iha setór privadu sira.

“Ami prevee orsamentu ida ba setór privadu no ha’u ko’alia ho diretór sira katak setór privadu ne’e lalika barak, tau uluk lima, lahatene sé, depois ita haree, ita haruka sira atu halo saida depois ita buka merkadu”, Julião afirma iha edifísiu Akait ohin, bainhira hasoru malu ho Asosiasaun Emprezária Feto Timoroan (AEMTL-sigla iha portugés) ne’ebé mak hakarak rona polítika SEFOPE nian iha mandatu tinan lima.

Julião dehan Governu nia papél maka investe iha setór privadu sira tantu iha asosiasaun emprezáriu feto ka mane no sé de’it mak iha hanoin, programa no polítika di’ak atu dezenvolve país ida ne’e Governu iha atu apoia.

“Se Governu mesak ita labele dezenvolve nasaun ida ne’e, tenke iha setór privadu sira, tenke investe se la’e labele”, katak.

Governu no setór privadu sai hanesan parseiru importante atu dezenvolve nasaun ida ne’e, tanba Governu mesak labele ezekuta planu hirak ne’ebé iha, nune’e presiza ema hotu nia kontribuisaun.

“Iha Oitavu Governu nian iha polítika kada ministeriu ida-idak, ne’ebé iha pontu ualu ne’ebé sai importante ba serbisu Sekretáriu ida ne’e nia no pontu ida mak atubele envolve igualdade jéneru ba implementasaun programa liuhusi SEFOPE”.

Iha enkontru ne’e AEMTL aprezenta sira-nia planu no programa, hato’o mós rekomendasaun, preokupasaun no kooperasaun ho Governu iha área emprezariál, turizmu, agrikultura, infraestrutura no seluk tan.

Vise-Prezidente Agrikultura AEMTL, Fátima Belo, dehan asosiasaun ida ne’e hakarak sai parseiru di’ak Governu nian.

“Ami mós halo advokasia ho NGO internasionál sira ne’ebé sei la’o hela, ami atu hakbesik ba membru Governu sira, maibé tinan ne’e nia laran sei preokupa ho orsamentu, programa no situasaun sira ne’e hotu ne’e mak ami seidauk”, hatutan.

Nia akresenta: “Maibé depois Maromak tulun atu Prezidente promulga orsamentu, ami mós sei bá baku ministériu, Sekretáriu Estadu ida-idak nia odamatan atu halo oinsá mak ita atu koopera hodi hala’o atividade ne’ebé iha atubele la’o hamutuk ho ami ho programa ne’ebé Governu iha”.

Iha okaziaun ne’e mós prezidente interina AEMTL, Anastacia da Costa Soares Amaral, agradese ba SEFOPE hanesan membru Governu dahuluk ne’ebé maka vizita bá asosiasaun ne’e no husu atu serbisu hamutuk ho Governu hodi kotribui ba konstrusaun Estadu ida ne’e.

Jornalista: Maria Auxiliadora

Editora: Rita Almeida

HUSIK IDA HATÁN