PN Aprova Ona Orsamentu MNEK-MJ ho MAE

0
100
Votasaun iha jeneralidade Orsamentu Jerál Estadu 2018. Imajen António Goncalves

DILI (TATOLI) –Orsamentu ba Ministériu Negósiu Estranjeiru no Kooperasaun (MNEK) ho montante millaun $22,433, Ministériu Justisa (MJ) millaun $13,840 no Ministériu Administrasaun Estatál (MAE) millaun $7,832, Parlamentu Nasionál (PN), aprova ona.

Aprovasaun ne’e Parlamentu Nasionál, halo liuhosi votasaun iha diskusaun Orsamentu Jerál Estadu (2018) faze espesialidade iha loron dahaat, iha plenária, Kuarta (5/9).

Orsamentu ba MNEK ne’ebé aloka ba saláriu no vensimentu millaun $13,024, bens no servisu millaun $9,409 ho total despeza ba MNEK millaun $22,433, osan ne’e inklui ona ho embaixada no konsuladu Timor-Leste iha estranjeiru.

Aprova ho rezultadu a favor 55, kontra 0, no abstensaun 9 no hetan proposta rua, maibé proposta ida (39) aprovadu  iha dotasaun governu, enkuantu proposta seluk (4) pasa ho rezultadu a favor 46, kontra 2, no abstensaun 1.

Proposta 39 ne’ebé aprovadu ona, iha aumenta osan $500.000 ba orsamentu MNEK, enkuantu proposta 4 ne’ebé aprezenta husi deputada Fernanda Lay no deputadu Adérito Hugo, atu adita transferénsia Unidade Emisaun Dezenvolvimentu Rejionál Integradu husi Ministériu Planeamentu no Investimentu Estratéjiku (MPIE), tanba  ne’e aprezenta proposta atu transfere fali ba MNEK.

Tuir orgánika VIII Governu Konstitusionál unidade emissaun dezenvolvimentu rejionál integradu iha dependénsia iha MNEK, la’ós MPIE.

Deputada Fernanda Lay argumenta, proposta ne’e para muda tuir Lei Orgánika VIII Governu atu fasilita supervizaun ba ezekusaun orsamentu nomós Ministériu Finansas (MF) iha dotasaun finál bele hadia tuir estrutura orgánika.

Biban hanesan, PN mós aprova orsamentu ba MJ ho rezultadu afavor 49 kontra 0 no abstensaun 15. Orsamentu ba MJ, ba saláriu no vensimentu millaun $4,750, bens no servisu millaun $9,089 ho total despeza ba ministériu ne’e millaun $13,840.

Orsamentu ne’e hetan proposta alterasaun rua (16 no 17) no husi proponente ne’ebé mak hanesan deputada Carmelita Caetano Moniz, deputadu Francisco Vasconcelos, deputadu Joaquim dos Santos no deputadu Adriano do Nascimento.

Proposta 16 ne’ebé pasa ho votu a favor 47, kontra 0, no abstensaun 16, ba órgaun MJ iha kategoria bens no servisu ne’ebé dotasaun inisiál $39.000, proposta aditamentu $2,030 ho dotasaun finál millaun $2,069, proposta aditamentu ne’e mai husi Komisaun Administrasaun Fundu Infraestrutura (KAFI) husi kapitál dezenvolvimentu, ne’ebé dotasaun inisiál millaun $323,600, redusaun millaun $2,030 ho dotasaun final millaun $321,570.

Husi Justifikasaun, propoin aditamentu husi kategoria bens servisu atu kobre despezas hanesan millaun $1,823 ba pagamentu asisténsia téknika projetu Sistema  Nasionál Kadastru (SNC-sigla portugés), no $12.007 ba pagamentu remunerasaun profisionál sira husi agostu to’o dezembru.

Nune’e mós proposta 17 ne’ebé pasa ho rezultadu  favor 50 kontra 0 no abstensaun 14, ba kategoria despeza kapitál dezenvolvimentu ne’ebé dotasaun inisiál 0, adisionál $424.000. Nune’e dotasaun finál $424.000. Atu propoin ba aditamentu mai husi kapitál dezenvolvimentu husi fundu infraestrutura ne’ebé nia montante inisiál millaun $323,600, proposta redusaun $424.000, nune’e dotasaun finál millaun $323,176.

Justifikasaun, propoin aditamentu husi verba kapitál dezenvolvimentu atu kobre despeza hanesan $302.000 ba pagamentu konstrusaun edifísiu defensoria públika Munisípiu Bobonaro no Ermera, $124.000 ba pagamentu pursentu 10 retensaun reabilitasaun prizaun Suai.

Ikus liu, PN aprova mós orsamentu ba MAE ho rezultadu afavor 40, kontra 1 no abstensaun 23, diskrisaun orsamentu mak saláriu no vensimentu millaun $3,818, bens no servisu millaun $3,332, transferénsia públika $662.000, ho total despeza millaun $7,832.

Ba orsamentu MAE iha proposta rua (44 no 65), maibé la-pasa. Antes ne’e PN aprova ona proposta rua 95 no 96, ho nune’e dotasaun ba MAE Iha aumentu $522.000.

Proposta 44, ne’ebé aprezenta husi deputada Angélica Rangel, deputadu António da Conceição no deputadu Joaquim dos Santos, hato’o órgaun MAE iha Diresaun Nasionál Finansas no Patrimóniu ba kategoria despezas

Bens no servisu, ne’ebé dotasaun inisiál millaun $2,399, alterasaun ou redusaun $100.000, ho dotasaun finál ba kategoria ne’e millaun $2,299. Proponente konsidera orsamentu boot tebes no laiha justifikasaun ne’ebé fundamentu.

Proposta 65, ne’ebé aprezenta husi deputadu Antoninho Bianco no deputadu Adriano do Nascimento, justifika proposta redusaun ba Administrasaun no Finansas iha MAE, iha kategoria bens no servisu millaun $2,399, servisu professional sira $374.000, ho nune’e dotasaun inisiál iha kategoria bens no servisu konkretu ba servisu professional sira $374.000, proposta redusaun $274.000, ho dotasaun finál $100.000.

Proponente husu redusaun tanba  governu seidauk esplika montante osan refere atu halo saida.

Jornalista: Julia Chatarina

Editór : Manuel Pinto

HUSIK IDA HATÁN