Permatil Hakarak Realiza Akampamentu Hodi Selebra Loron Juventude Nasionál

0
119
Diretór Ezekutivu Permatil, Ego Lemos, hafoin sorumutu ho Sekretáriu Estadu Komunikasaun Sosiál iha Palásiu Governu, ohin. Foto Antonio Goncalves

DILI, (TATOLI) – Organizasaun Naun Govermentál (ONG) Permakultura Timor Lorosa’e (Permatil) hakarak halibur joventude hamutuk 1000 resin hodi halo akampamentu (baraka) iha Maubisse ba dalimak ne’ebé sempre realiza kada tinan rua hodi selebra loron juventude nasionál iha loron 24 novembru.

“Akampamentu ne’e sei hala’o iha 25 novembru to’o 1 dezembru, liuhosi akampamentu ne’e ita selebra mós loron juventude nasionál nomós selebra loron independénsia nasionál Timor-Leste nian liuhosi asaun, tanba dalabarak ita selebra liuhosi seremoniál de’it”, katak Diretór Ezekutivu Permatil, Ego Lemos, ba jornalista sira iha Palásiu Governu, ohin.

Nia hatutan: “Tinan ne’e organizasaun permatil ho ekipa hakarak lori maluk sira hotu hodi selebra loron nasionál no independénsia nasionál liuhosi asaun no dezenvolvimentu komunitária”.

Nia dehan tan akompamentu ne’e koko organiza atividade oin-oin ne’ebé liga ho agrikultura, turizmu no atividade seluk tan.

Ho atividade ne’e, ninia parte sorumutu ho Sekretária Estadu Komunikasaun Sosiál (SEKOMS) atu halo formasaun ba joven sira oinsá bele utiliza mídia sosiál ho di’ak no étika, la’ós atu defama malu maibé aprende atu hetan informasaun husi rai liur no fahe esperénsia liuhosi mídia sosiál, nune’e bele hamutuk ho joven sira halo unidade.

“Ohin ami mai hasoru SEKOMS hodi koopera hamutuk para habelar liu fali informasaun, liu-liu ba joven sira, tanba maioria populasaun ne’e joven, se-kuandu ita la prepara programa di’ak ba joven sira mak joven sira mak sei sai husi sira nia knua, suku, hafoin ba sidade no ba rai seluk”.

Nia mós hatutan, organizasaun Permatil nu’udar organizasaun ONG ida ne’ebé iha preukupasaun hanesan Estadu no governu, oinsá mak bele hamutuk bele dezenvolve no forma juventude atu hadomi rai Timor hanesan sira nia rai no prontu atu kontribui no dezenvolve iha sira nia fatin.

Parte seluk Sekretetáriu Estadu Komunikasaun Sosiál, Merício Juvenal dos Reis Akara, hateten prontu atu kolabora.

“Sira hakarak durante akompamentu ne’e bele aprende oinsá bele uza mídia sosiál ho di’ak, oinsá uza internet ne’ebé produtivu, la’ós defama ema de’it maibé edukativu”, katak Akara.

Akampamentu ne’e sei envolve mós joven husi nasaun seluk hanesan Austrália, Indonézia, Argentina no seluk tan, tanba ne’e tuir Merício ne’e inisiativa di’ak.

Jornalista: Julia Chatarina

Editora: Rita Almeida

HUSIK IDA HATÁN