DILI, (TATOLI) – Deputadu bankada Partidu Demokrátiku (PD), Mariano Assanami Sabino, hateten PD fó apoiu ba proposta lei Orsamentu Jerál Estadu (OJE) 2018 ho konsiénsia liuhosi votasaun finál globál iha plenária Parlamentu Nasionál (PN), tanba konsidera importante atu sai husi impasse polítika.
“Partidu Demokrátiku fó votu a favór ba orsamentu 2018 ho konsiénsia tomak, katak orsamentu ida ne’e importante para ita atu sai husi impasse polítika ne’ebé durante ne’e ita hasoru”, tenik iha deklarasaun votu hafoin votasaun finál globál, ohin.
Hodi hatutan: “Señor Primeiru-Ministru (PM), ita boot la’ós de’it Primeiru-Ministru ne’ebé rezulta husi eleisaun demokrátika ida, maibé ita boot mós komandante no lider gerrilleiru ida no sai eis Prezidente Repúblika ne’ebé nakonu ho autoridade no responsabilidade atu bele iha faze ida ne’ebé difísil, maibé PD prontu iha ita boot nia kotuk hodi hakat ba oin ho firme no forte”.
Prezidente PD ne’e dehan votu a favór PD, fó konfiansa tomak ba membru ne’ebé mak agora dadaun hamutuk ho PM, ho hanoin ida katak tenke firme nafatin ba kontrusaun Estadu.
“Ita tenke deside, tenke hakat nafatin ba oin para ita nia konstrusaun Estadu no konstrusaun Nasaun ne’e bele metin liu, para bele fó Timor-Leste ne’ebé ho kór diferente iha mapa mundu”, dehan tan.
Tuir lider jerasaun foun ne’e orsamentu ne’ebé mak PN aprova ona, atu bele rezolve no apoiu liután ba ferik no katuas sira, ba joven sira, veteranu, profesór kontratadu, xefe suku no xefe aldéia sira.
“Ita tenke hadi’a mekanizmu para timoroan hotu-hotu goza iha rai ida ne’e ho dignu, katak ferik katuas sira tenke simu osan iha sira nia fatin, la’ós mai antri iha fatin-fatin”, katak.
Nune’e mós nia dehan, PD nia votu atu fó apoiu nafatin luta ba Delimitasaun Fronteira Marítima, ne’ebé mak lidera husi Xefe Negosiadór, Xanana Gusmão.
Nia mós dehan votu ne’e hodi fó mós apoiu ba ZEEMS ne’ebé mak halo ona, ho ba faze tuir mai sei investe nafatin ba sosiál merkadu hodi bele la’o ho di’ak, ne’ebé lidera husi Prezidente ZEEMS, Marí Alkatiri.
“PD nia apoiu ba orsamentu ida ne’e, atu apoiu ba lideransa fundadór Nasaun sira hanesan Taur Matan Ruak, Xanana Gusmão, Marí Alkatiri, Lú Olo no Ramos Horta, imi nain lima mak bele iha lalenok nafatin ba jerasaun foun oin, PD sempre iha imi nia kotuk ba konstrusaun Estadu ne’ebé mak metin no fó esperansa ba jerasaun tuir mai”, katak.
Entretantu, rezultadu husi votasaun proposta lei OJE 2018, aprovadu ho votu a favór 42, kontra sia no abstensaun 14. Deputadu PD nain lima votu a favór hotu iha votasaun ikus orsamentu ne’e.
Jornalista: Julia Chatarina
Editora: Rita Almeida
