MF Distribui Ona Envelope Fiskál 2019

0
182
Diretór Jerál Finansa Estadu Ministériu Finansa (MF), Januario da Gama, bainhira ko’alia iha panorama orsamentál 2019 iha MF Aitarak Laran. Imajen Egas Cristovão

DILI, (TATOLI) – Ministériu Finansa (MF) distribui ona tetu dezagregadu ne’ebé halo tuir desizaun Konsellu Ministru nian iha 21 setembru ne’ebé aprova ona tetu fiskál agregadu ho montante $1,350,000,000 ne’ebé lainklui empréstimu hodi finansia despeza Estadu.

Diretór Jerál Finansa Estadu MF, Januário da Gama, hatete tetu ida ne’e dezagrega ba saláriu no vensimentu hamutuk milliaun $199.57, bens no servisu aloka milliaun $305.2 inklui Fundu Dezenvolvimentu Kapitál Umanu, transferénsia públika milliaun $622.36, kapitál menór milliaun $4, kapitál dezenvolvimentu milliaun $218.87 no iha tinan oin aloka mós montante balun ba kapitál dezenvolvimentu-empréstimu hamutuk milliaun $87.

“Husi tetu ne’ebé dezagrega iha 2019 ministériu no instituisaun sira tenke halo reflesaun ba prioridade nasionál ne’ebé diskute ona iha sesaun jornada orsamentál no aprova ona husi Konsellu Ministru”, Januário afima ohin, hafoin fahe tetu fiskál OJE 2019 nian ba liña ministériu, servisu fundu autónoma, munisipál no instituisaun Estadu hotu iha MF Aitarak-Laran.

Prioridade nasionál ne’ebé adota iha OJE 2019 maka hasa’e produsaun agríkola hodi hametin seguransa ai-han no hamenus má nutrisaun, promove edukasaun no formasaun inkluziva ho kualidade no orientadu ba merkadu.

Alende ne’e hametin servisu saúde ne’ebé kualidade no inkluzivu hodi kontinua programa saúde na família, dezenvolve infraestrutura bázika ba bee-moos no saneamentu, estrada, eletrisidade telekomunikasaun (fibra óptika), portu no aeroportu, hametin instituisaun ba desentralizasaun administrativa, promove dezenvolvimentu setór privadu no promove ambiente negósiu hodi haburas investimentu setór privadu.

“Husi tetu dezagregadu ne’ebé fahe; ministériu, instituisaun no ajénsia autónoma sira tenke halo reflesaun ba prioridade ne’e no halo reflesaun ba planu tinan lima no Planu Estratéjiku Dezenvolvimentu Nasionál nian”, katak.

MF fó tempu ba ministériu sira hotu atu prepara sira-nia orsamentu no sei submete ba fali MF iha 12 outubru ne’e hodi bele halo preparasaun no análiza ida no rekomenda ba Komité Revizaun Orsamentu Polítika para bele halo apresiasaun no desizaun kona-ba aliñamentu entre despeza no programa ne’ebé Governu deside ona liuhusi tetu OJE 2019 nian.

Enkuantu proposta OJE 2018 ne’ebé iha ona gabinete Prezidente Repúblika nian seidauk promulga no MF halo ona distibuisaun pakote fiskál 2019  maka Diretór Jerál ne’e espera xefe Estadu sei promulga atu finansia despeza iha períodu tinan ne’e.

“Ne’e iha nia natureza ketak ida, tanba proposta OJE 2018 sei halo finansiamentu ba despeza no programa iha anu fiskál 2018 nian, agora tetu fiskál (2019) ne’ebé distribui ne’e hola korrespondénsia ba programa no despeza ne’ebé Governu sei halo iha orsamentu 2019”.

Ministra Finansa en ezersísiu, Sara Lobo Brites, hatete sesaun traballu ne’e importante tebes, tanba hanesan marka preparasaun ba OJE 2019 liuhusi distribuisaun envelope fiskál no husi sekuénsia ida ne’e hahú husi jornada orsamentál.

“Ita prepara orsamentu iha tempu badak, ha’u fiar katak sei submete ba Parlamentu iha 8 novembru. Ba ida ne’e serbisu ida maka’as husi ita hotu tenke kumpri kalendáriu, tanba ida de’it mak lakumpri, ita falla halo submisaun ba Konsellu Ministru nomós ba Parlamentu”.

Sara reitera Primeiru-Ministru nia liafuan katak importante agora haree ba moris di’ak povu nian no gastu ne’ebé ba iha mákina labele boot liu fali gastu ne’ebé mak sei tau hodi fó apoiu programa ba sidadaun nia moris di’ak.

Jornalista: Maria Auxiliadora

Editora: Rita Almeida

HUSIK IDA HATÁN