Korea Hakarak SEKOMS Disemina Informasaun Traballadór Timoroan

0
84

DILI, (TATOLI) – Embaixadór Korea Sul ba Timor-Leste, Lee Chen-Bum, husu ba Sekretáriu Estadu Komunikasaun Sosiál (SEKOMS), Merício Juvinal dos Reis Akara, oinsá estabelese kooperasaun iha área komunikasaun sosiál.

“Ami ko’alia kona-ba asuntu balun em relação haruka traballadór ba Korea, oinsá SEKOMS bele ajuda ami halo promosaun, diseminasaun informasaun ba komunidade kona-ba parte rua ne’e halo”, Lee Chen-Bum ba jornalista sira hafoin hasoru malu ho SEKOMS iha Palásiu Governu, ohin.

Momentu hanesan, Merício Akara hatutan garante katak ekipa SEKOMS prontu iha nível operasionál, tékniku; sei kontaktu, komunika malu, aselera prosesu ne’e lalais para bele kanaliza informasaun sira ne’e ba iha rádiu, televizaun, liuliu RTTL, para hahú halo promosaun, promove mós aspetu pozitivu sira, inspira joven no sidadaun para halo planu vida di’ak liu.

“Parte SEKOMS prontu. Lalais liu, di’ak liu! Ne’e mak ita-nia slogan”, subliña Akara hodi hatan ba TATOLI kona-ba oinsá prontidaun SEKOMS nian hodi bele koopera ho governu Korea Sul.

Entretantu, durante sorumutu parte rua halo aprezentasaun video badak kona-ba saida mak SEKOMS halo nomós oinsá prosesu dezenvolvimentu Korea Sul nian, hahú husi destruisaun, tanba funu to’o bele rekupera nia ekonomia hodi sai nasaun prósperu ida.

Hasoru malu ohin nu’udar mós inísiu kooperasaun entre Korea Sul liuhusi nia embaixada iha Dili ho SEKOMS.

Video kona-ba notísia relevante, klik: https://www.youtube.com/watch?v=aVplYNwG8Wo&feature=youtu.be

Jornalista: Rafy Belo

Editora: Rita Almeida

HUSIK IDA HATÁN