Konsellu Ministru Halo Avaliasaun Ba Proposta Kapitalizasaun BNCTL

0
340
Primeiru-Ministru, Taur Matan Ruak, lidera enkontru Konsellu Ministru, kuarta, (21/9). Imajen António Goncalves

DILI, (TATOLI) – Governu liuhosi reuniaun Konsellu Ministru (KM), halo avaliasaun ba proposta kapitalizasaun Banku Nasionál Komérsiu Timor-Leste (BNCTL-sigla portugués) atu reforsa kapitál atuál.

“Reuniaun Konsellu Ministru ohin governu estuda no avalia proposta kapitalizasaun ba BNCTL, atu reforsa liután kapitál atuál banku ne’e nian, nune’e iha forsa no kapasidade naton atu bele halo atuasaun ba situasaun finanseira iha kualker tempu, momentu no konteksu”, katak Ministru Reforma Lejislativa no Assuntus Parlamentár, Fidelis Leite Magalhães, ba jornalista sira hafoin reuniaun ezekutivu iha Palásiu Governu, ohin.

Nia hatutan BNCTL hanesan Banku Estadu, horiseik realiza Assembleia Jerál no tuir despasu konjuntu ida husi Ministra em ezersísiu Finansa, Sara Lobo Brites no Ministru em ezersísiu Ekonomia no Dezenvolvimentu, katak nia parte mak reprezenta asionista no reprezenta governu hodi tau matan ba BNCTL.

“Ami informa ona ba Konsellu Ministru ohin kona-ba rezultadu husi aplikasaun husi lala’ok BNCTL nian no lukru hirak mak BNCTL konsege halo iha tinan 2017. Nune’e BNCTL atu espande liután produtu atu bele sai atrativu liután ba ita nia populasaun”, katak.

Governnate ne’e haktuir, biban ne’e mós governu ko’alia konaba BNCTL nia aset sira seluk no governu nia hanoin kona-ba dalan ba oin, tantu nia kapitál no aset sira bens imóvel sira rasik.

Nia mós informa, enkontru ohin mós halo diskusaun Assembleia Jerál estraordinária tuir mai ne’ebé sei realiza aban (kinta) iha Timor Plaza, governu hanesan asionista porsentu 100 BNCTL nian, bele fó hanoin no bele orienta servisu orgaun sosiál banku nian.

Kona-ba kapitalizasaun ba BNCTL, nia dehan seidauk define montante maibé iha ona proposta, no buat ne’ebé mak governu halo mak sei haree mak rezultadu aplikasaun BNCTL tinan 2017 nian no análize ho klean dezempeñu durante ne’e, hafoin haree implikasaun ekonómika no haree iha ou laiha kapitalizasaun karik, hafoin deside sei atu kapitaliza karik ho montante hira mak presiza no saudável ba banku ne’e nia lala’ok.

“Injesaun kapitál de’it sein prudénsia, ne’e ladiak ba instituisaun ne’e rasik no ami fiar katak orgaun hanesan banku BNCTL mós konsiente ho ida ne’e. Ita hotu hakarak atu halo utilizasaun kapitál ne’ebé mai husi osan públiku nian, bele iha injesaun ne’ebé di’ak”, dehan tan.

Nia mós dehan banku reguladór hanesan Banku Sentrál Timor-Leste (BCTL-sigla iha portugués) mós halo kontrolu ida di’ak ba sistema banku iha Timor-Leste, enkuantu BNCTL halo esforsu hotu atu kumpre regra vijente sira.

Agora dadauk kapitál inisiál iha BNCTL purvolta milliaun $17 no banku ne’e iha tinan 2017 halo operasaun ho osan milliaun $4 resin, no desde harii to’o agora konsege lori osan purvolta milliaun $9 ne’ebé audit no konfirma ona.

“BNCTL nia dezempeñu durante ne’e di’ak no nia taxa retornu ba kapitál própriu, katak nia valór osan iha investimentu ne’e di’ak, purvolta porsentu 12 ne’ebé kada dolar mak governu investe ninia retornu ne’e purvolta 12 sentavu”, tenik tan.

Entretantu, antes ne’e VIII Governu Konstitusionál nomeia Ministru Reforma Lejislativa no Assuntus Parlamentár, Fidelis Leite Magalhães, hanesan asionista ba BNCTL durante governasaun Primeiru-Ministru (PM), Taur Matan Ruak.

Prezidente Konsellu Administrasaun BNCTL, Brígido de Sousa, momentu ne’ebá hateten Ministériu Ekonomia no Dezenvolvimentu no Ministériu Finansa mak nomeia governante ne’e.

“Asionista ne’e reprezentante Estadu iha BNCTL, hodi haree osan ne’ebé governu rai hodi jere tuir lala’ok banku nia ou la’e”, tenikk hadoin sorumutu ho Ministru Fidelis foin lais ne’e.

Funsaun seluk mak ajuda BNCTL hodi implementa polítika fó kréditu ba kliente, asesu finanseira ba komunidade hodi halo negósiu no seluk tan apóiu prosesu dezenvolvimentu rai laran.

Jornalista: Julia Chatarina

Editora: Rita Almeida

HUSIK IDA HATÁN