Kazu EBC Fatumeta Sei Prosesu Investigasaun

0
80

DILI, (TATOLI) – Parte Ministériu Edukasaun Juventude no Desportu (MEJD), seidauk bele halo komentáriu ba kazu agresaun fíziku hosi família estudante ba profesór eskola bázika sentrál númeru 4 Fatumeta, Cornelio Sequeira dos Santos.

“MEJD aproveita komunikadu ida ne’e atu hato’o katak Polísia Nasionál Timor-Leste fó seguransa hela ba eskola Fatumeta, nune’e hahú aban, 21 setembru aula aprendizajen sira tenke hala’o normál. MEJD apela ba inan-aman sira hotu atu haruka sira-nia oan fila ba eskola hanesan normál”, apela MEJD liuhusi komunikadu ne’ebé Tatoli asesu.

Nota ne’e mós haktuir MEJD deside atu transfere imediatamente profesór ne’ebé hetan agresaun fíziku ne’e hala’o serbisu iha eskritóriu edukasaun munisípiu Dili to’o prosesu investigasaun remata.

Desizaun ida ne’e la implika ba profesór nia sala ka la’e, maibé simplesmente atu proteje nia no estudante sira hotu iha EBC Fatumeta durante prosesu investigasaun la’o. Se prosesu investigasaun prova katak profesór ne’e sala duni, inspetór jerál husi MEJD sei haruka relatóriu ba Komisaun Funsaun Públika (KFP), no husu asaun disiplinár ida ho rigor.

MEJD kondena kualker uzu violénsia kontra alunu ka kontra profesór. Lei relevante sira fó sai ho klaru katak profesór labele uza violénsia kontra estudante sira nomós MEJD fornese formasaun ona kona-ba disiplina pozitiva. Nune’e se profesór uza violénsia kontra estudante duni, ne’e signifika profesór mak viola lei.

Tuir polítika edukasaun inkluzivu, profesór no diretór iha responsabilidade atu komunika ho estudante idaidak nu’udar individu no buka maneira atu enkoraja susesu eskolár husi estudante sira hotu.

Uzu violénsia hanesan maneira atu fó dixiplina ba estudante sira hatudu de’it falta kreatividade, sensibilidade no profesionalizmu husi profesór no ministériu sempre rekomenda uza medida disiplina pasífika sira hanesan justisa restorativa.

MEJD nunka apoiu ba interupsaun iha prosesu ensinu aprendijazen ida no sita ho momoos katak asegura estudante nia seguransa. Profesór sira hanorin ho maneira efetivu, respeitozu no tuir lei ba estudante sira, ida ne’e mak responsabilidade prinsipál husi diretór eskola. MEJD sei foti medida hasoru diretór sira ne’ebé mak la kumpre sira-nia kna’ar.

Jornalista: Rafy Belo

Editora: Rita Almeida

HUSIK IDA HATÁN