Governu Sujere RTTL,EP Aumenta Programa Ba Labarik

0
79
Estudante sira hasai foto hamutuk hafoin sorumutu ho Sekretáriu Estadu Komunikasaun Sosiál (SEKOMS), Merício Juvenal dos Reis Akara, iha Palásiu Governu, ohin. Imajen Egas Cristovão

DILI, (TATOLI) – Sekretáriu Estadu Komunikasaun Sosiál, Merício Juvenal dos Reis Akara, hateten Radiu Televizaun Timor-Leste, Empreza Públika (RTTL,EP) presiza aumenta programa edukativu, inspirativu no kreativu ba labarik sira iha Timor-Leste.

Tuir nia labarik barak iha talentu kreativu no inspirativu maibé la hetan oportunidade  asesu  ba  mídia Estadu.

ʺSira mak futuru nasaun, tanba ne’e ita tenke tau atensaun barak liután, investe maka’as ba sira, apoiu sira nia kreatividade hodi prepara sira nia talentu, karaterístiku, kapasidade hahú agoraʺ, dehan Akara hafoin simu vizita hosi estudante eskola primária segundu siklu Santa Madalena Canossa Dili, iha Palásiu Governu, ohin.

Governante ne’e apresia no inspira ho aprezentasaun estudante ne’ebé uza instrumentu múzika angklung (hosi indonézia) kanta múzika tradisionál Timor nian.

Tuir esplikasaun estudante sira katak aprende instrumentu ne’e hosi sentru kultura Indonézia nian iha Dili (Mascarenhas).

ʺSira nia visita mai ne’e atu anima no rona sira nia hanoin kona-ba kultura no istóriaʺ, afirma Akara. Hodi hatutan aprejentasaun hanesan sei hatudu ba Primeiru-Ministru.

Responsavel no treinadór hosi grupu istória no kultura eskola Santa Madalena Canosa, Mikael Acasio, hateten vizita ne’e hodi husu apoiu ba SEKOMS atu fó espasu ba sira hodi promove di’ak liután atividade grupu estudante ne’ebé foku barak liu ba kultura no istória.

Atividade estudante maka dansa kultura, audiovisuál, teatru, poezia, aprende istória hodi vizita fatin istóriku hodi kontinua divulga ba públiku.

Mikael hatete audiovisual ninia parte servisu hamutuk ho GMN-TV hodi fó sai kona-ba istória no kultura liuhosi dansa no seluk tan.

Grupu estudante ne’e mós prodús filme badak kona-ba istória no kultura hodi fasilita labarik sira iha área rurál.

ʺPrograma audiovisuál ne’e ami syuting (filma), labarik sira halo teatru hodi prodús ba filmajen badakʺ, realsa responsavel ne’e.

Grupu estudante ne’e iha membru 35 kompostu estudante kuatru no kintu anu.

Jornalista: Agapito dos Santos

Editora: Rita Almeida

HUSIK IDA HATÁN