Governu Husu Kada Ministériu Tenke Respeitu Tetu Orsamentál

0
244
Enkontru Konsellu Ministru, ohin. Foto António Goncalves

DILI, (TATOLI) – Governu liuhosi reuniaun Konsellu Ministru (KM), ohin diskute tetu Orsamentu Jerál Estadu (OJE) 2019 ne’ebé aprova ona iha semana kotuk ho montante billiaun $1.350 no biban ne’e governu husu kada ministériu respeitu tetu orsamentál ne’ebé fahe ona ba kada ministériu.

“Horisehik Ministériu Finansa (MF) fahe ona envolope fiskál tinan 2019 nian ba liña ministeriál sira, hanesan bain-bain ministru sira nunka kontente, tanba ne’e ami diskute hela oinsá mak tenke respeitu tetu orsamentál ne’ebé Konsellu Ministru aprova ona iha semana kotuk. Nune’e mós orsamentu tinan 2018 nian mós seidauk promulgadu husi Prezidente Repúblika”, tenik Ministru Estadu Prezidénsia Konsellu Ministru, Agio Pereira, ba jornalista sira hafoin reuniaun ezekutivu iha Palásiu Governu, ohin.

MF fahe ona tetu dezagregadu ne’ebé halo tuir desizaun KM loron 21 setembru ne’ebé aprova ona tetu fiskál agregadu ho montante billiaun $1.350 ne’ebé inklui impréstimu hodi finansia despeza Estadu.

Tetu fiskál tinan 2019 ne’e dezagrega ba saláriu no vensimentu hamutuk milliaun $199,57, bens no servisu milliaun $305,2 inklui ona ho Fundu Dezenvolvimentu Kapitál Umanu (FDCH-sigla portugués), transferénsia públika milliaun $622,36, kapitál menór milliaun $4, kapitál dezenvolvimentu milliaun $217,87 no iha tinan oin aloka mós montante balun ba kapitál dezenvolvimentu no impréstimu hamutuk milliaun $87.

Maske nune’e, MF fó tempu ba ministériu sira hotu hodi prepara sira nia orsamentu hodi submete fali ba MF iha loron 12 outubru, hodi halo preparasaun, análiza, no rekomenda ba Komité Revizaun Orsamentu Polítika para halo apresiasaun no desizaun kona-ba aliñamentu entre despeza no programa ne’ebé governu deside ona liuhosi tetu OJE 2019 nia.

Tuir planu, proposta lei OJE 2019 ne’e sei submete ba Parlamentu Nasionál (PN) iha loron 8 novembru 2018, mesmu tuir Ministra Finansa em ezersísiu, Sara Lobo Brites, atu kumpre kalendáriu ne’e servisu maka’as, tanba ida de’it mak la kumpre mak sei falla halo submisaun iha KM no PN.

Alende ne’e, reuniaun ezekutivu ohin mós análiza aprezentasaun husi Ministru Agio kona-ba pontu situasaun negosiasaun ba rezolusaun kestaun téknika sira hodi halo ratifikasaun ba Tratadu Ketan Tasi

“Kona-ba Ratifikasaun Tratadu Ketan Tasi, oras ne’e negosiasaun la’o hela tanba iha kestaun téknika barak hanesan arranju tranzisaun tenke rezolve lai mak foka iha promulgasaun ba Austrália no Timor-Leste”, dehan ministru Agio Pereira.

Jornalista: Julia Chatarina

Editora: Rita Almeida

HUSIK IDA HATÁN