G7+ Importante Tenke Mantein no Kontinua Investe

0
164
Primeiru-Ministru, Taur Matan Ruak, akompaña hosi membru governu sira partisipa diskusaun jeneralidade Orsamentu Jerál Estadu 2018 ba loron datoluk iha uma fukun Parlamentu Nasionál, ohin. Foto António Goncalves

DILI, (TATOLI)—Primeiru Ministru (PM), Taur Matan Ruak, afirma; misaun G7+ importante, tanba ne’e tenke mantein, no kontinua investe.

“G7+ ami sei kaer hela tanba ami hanoin tenke konsolida antes transfere ba MNEK, tanba ne’e agora ita mantein no ha’u tau makas ba asuntu ida ne’e ba vantajen ne’ebé mak ita hetan, liu-liu projesaun internasionál,” Xefe Governu esplika hodi hatán ba preokupasaun membru parlamentu nasionál  sira ne’e konsidera ezisténsia G7+ hanesan halo duplikasaun servisu ba instituisaun. Iha plenária diskusaun Orsamentu Jerál Estadu 2018, ohin.

PM Taur Matan Ruak hatutan, Timor-Leste hanesan país ki’ik hanesan tenke hatudu an katak util no relevánsia ba nasaun seluk.

“Ha’u hanoin bainhira ita hetan problema, nasaun seluk mós suporta tanba ne’e ita la fó de’it, maibé simu mós husi nasaun seluk. Timor-Leste ukun-an konta ho apoiu rai seluk, ida ne’e ha’u la nega”, PM Taur fó hanoin.

Iha fatin hanesan Ministru Estadu no Prezidénsia Konsellu Ministru, Agio pereira hatutan ita nunka haluha sira seluk ne’ebé sei hakdasak, mézmu ita mós moris susar, tanba prinsípiu ne’e mak gia G7+ no lori Parlamentu Nasionál (PN) ratifika akordu sede iha ne’e.

“Servisu sekretariadu kobre 5 kontinente, tanba ne’e presiza osan ne’e atu viabiliza programa, espíritu no letra ne’ebé ita nia estadu asume ho nasaun 12”, Ministru Agio reforsa tan.

Enkuantu Xefe Bankada Partidu Demokrátiku (PD), António Da Conceição konsidera ezisténsia G7+ hanesan halo duplikasaun servisu ba instituisaun.

“Instituisaun rua halo buat hanesan, iha atendimentu ne’ebé ema bele hanoin ita halo kompetisaun iha ita nia rai laran rasik, ne’e duni ha’u hanoin relevante tebes karik ita hahú atu integra polítika ida ne’e iha Ministériu Negósiu Estranjeiru no Kooperasaun (MNEK) nia porfoliu, nune’e ita bele lori ita nia diplomata sira no bele extende ita nia misaun diplomata iha parte seluk, em vez de país bot sira redús sira nia prezensa iha timor, maibé ita ba loke ita nia iha fatin seluk”, António Da Conceição argumenta.

Tuir nia, G7+ di’ak hanesan instrumentu ida mós ne’ebé bele ajuda fortifika diplomasia Timor-Leste nian, maibé em termu institusionais la-presiza halo paralelizmu iha ita nia diplomasia.

Hanesan G7+ loke sede iha Portugal, maibé iha ne’ebá mós iha Embaixada Timor-Leste, uluk iha CPLP maibé foin lais ita taka. Ita hare hanesan duplika instituisaun iha li’ur para depois kontribui ba uza rekursu, ha’u hanoin karik sentidu iha liu kuandu polítika submete iha MNEK, em bora ezisténsia G7+ permanénsia, maibé nia atividade inklui ona tama polítika esterna Timor-Leste ne’ebé tutela iha MNEK.”

Deputadu David Ximenes Mandati husi bankada Fretilín reforsa G7+ bele kontinua, maibé tenke komesa respeita instituisaun ne’ebé ohin daudauk iha (MNEK), nune’e evita  paralelizmu no exbanzamentu.

Ho hanoin ne’ebé mak deputadu sira ne’e iha, ikus mai deputadu sira hamosu proposta ho númeru 72 ne’ebé aprezenta husi deputadu Antoninho Bianco no deputadu Adriano Do Nascimento, ne’ebé ikus mai retira hikas hakarak dotasaun ba governu hotu, provizaun ba G7+ iha rúbrika transferénsia públika ho montante millaun $1,125 iha konsessaun públiku sira, ne’ebé proposta alterasaun $500.000, ho dotasaun finál $625.000.

Tanba tuir Deputadu Antoninho Bianco, governu presiza fahe informasaun osan ne’ebé gasta ba G7+ nia rezultadu saida no se bele estadu bele prevee polítika G7+.

“Ita ajuda nasaun kiak sira, maibé atu ajuda ita nia kiak labele fali”. Nia lamenta

Nune’e mós deputadu Adriano Do Nascimento, sujere osan sira ne’ebé prevee ba G7+, di’ak liu kapitaliza ba BNCTL para povu sira hetan kréditu.

“Ita sei kiak ita ajuda ema kiak, ita nia povu kiak ba beibeik no ita empresta osan husi ema riku sira ba ita”. Nia lamenta tan

Hodi kontinua dehan, “Ha’u aseita iha dezastre ruma ita fó osan, tanba ne’e dezastre, maibé vantajen G7+ ba ita nia nasaun no povu ne’e saida? Liu-liu liga ho ita atu hamenus dezempregu no kiak iha ita nia nasaun”, Deputadu Adriano husu.

Jornalista: Julia Chatarina

Editór : Manuel Pinto

HUSIK IDA HATÁN