FRETILIN Ho Aliadu Haboot Polítika Inkluzaun

0
53
Líder partidu FRETILIN, PD no PUDD, liuhusi retiru iha Viqueque ho tema “Ampliar Inclusão Para Reforçar a Democracia”. Imajen espesiál

DILI, (TATOLI) – Partidu Frente Revolusionária Timor-Leste Independente (FRETILIN) hamutuk ho ninia aliadu hanesan Partidu Demokrátiku (PD) no Partidu Unidade Dezenvolvimentu Demokrátiku (PUDD) halo reflesaun kona-ba oinsá haboot inkluzaun atu haforsa demokrasia iha Timor-Leste ba oin.

Reflesaun polítika ida ne’e hala’o durante loron rua iha munisípiu Vikeke, 29 to’o 30 setembru 2018.

Tuir informasaun ne’ebé Tatoli asesu hosi mídia FRETILIN katak, loron dahuluk retiru, lideransa, kuadru superiór no kuadru médiu sira FRETILIN nian hala’o reflesaun kona-ba oinsá FRETILIN hakat ba oin.

Partisipante sira retiru nian halo apresiasaun ba Mosaun-Estratéjia FRETILIN nian ba oin ne’ebé hato’o husi Sekretáriu Jerál FRETILIN, Marí Alkatiri, no apresia mós ba aprezentasaun ekipa tékniku ida nian kona-ba serbisu sira ne’ebé FRETILIN halo durante eleisaun antesipada 2018.

Retiru ba loron daruak, involve FRETILIN nia aliadu sira, PD no PUDD. PD ninia delegasaun iha retiru ne’e lidera husi Prezidente PD, Mariano Assanami Sabino, no delegasaun PUDD nian lidera husi Sekretáriu Jerál PUDD, José Monteiro.

Reflesaun iha loron daruak ne’e foka liu-ba diskusaun entre FRETILIN ho ninia aliadu sira kona-ba oinsá aliansa bele haboot inkluzaun atu haforsa demokrasia hodi lori Timor-Leste ba oin tuir dalan ne’ebé di’ak no loos.

Ko’alia durante diskusaun loron daruak, Sekretáriu Jerál PUDD, José Monteiro, reafirma PUDD nia kompromisu atu hamriik firme hamutuk FRETILIN ho PD no hateten FRETILIN, PD ho PUDD presiza halo aliansa ida ne’ebé maka ho baze ba prinsípiu no valór.

Nune’e mós, Prezidente PD, Mariano Assanami Sabino, haklaken PD iha esperansa boot ba retiru nasionál ida ne’e atu bele hola desizaun sira ne’ebé importante atu lori FRETILIN ba hasoru dezafiu ne’ebé FRETILIN hasoru no Estadu Timor-Leste hasoru.

Entretantu, Sekretariu Jerál FRETILIN, Marí Alkatiri, esplika inkluzaun atu hala’o iha prosesu governasaun Estadu nian, no tanba ne’e labele konfundi ho konseitu adezaun iha partidu polítiku.

Marí hatutan tan: “Ba FRETILIN, inkluzaun la’ós atu dada partidu sira seluk mai tama FRETILIN, maibé respeita partidu sira seluk no inklui sira iha prosesu Governasaun Estadu nian, tanba inkluzaun ne’ebé FRETILIN hakarak maka atu haforsa demokrasia la’ós inkluzaun atu haforsa FRETILIN”.

“Iha FRETILIN nia laran rasik, sei iha programa boot rua maka Komité Sentrál atu aprova; ida atu hala’o formasaun polítika patriótika no ida seluk maka atu lori FRETILIN besik liu-ba povu, halo serbisu hamutuk ho povu”, esplika.

Tuir Marí retiru nasionál loron rua ne’e hala’o la’ós ho objetivu hasees ema ruma, maibé hala’o atu hakuak ema hotu-hotu.

FRETILIN nia Retiru Nasionál hakotu ho leitura ba komunikadu finál husi retiru nian no ku’a keek selebrasaun ba tinan 44 FRETILIN nia ezisténsia.

Jornalista: Xisto Freitas

HUSIK IDA HATÁN