FONGTIL Husu Governu Atu Kontinua Servisu Hamutuk

0
128
Ekipa Forum Organizasaun Noun Govermentál Timor-Leste (FONGTIL) hasoru malu ho Primeiru-Ministru, Taur Matan Ruak iha Palasiu Governu. Imajen Media GPM

DILI, (TATOLI) – Forum Organizasaun Naun Govermentál Timor-Leste (FONGTIL), hasoru Primeiru-Ministru (PM), Taur Matan Ruak, hodi husu atu kontinua servisu hamutuk, koopera iha implementasaun programa Governu daualu Konstitusionál.

“Ami husu ba PM atu fó nafatin espasu ba sosiedade sivíl, nune’e organizasaun ninia servisu hanesan membru FONGTIL iha baze bainhira deskobre buat ruma hanesan dezafíu iha implementasaun programa, polítika no atividade governu, bele kanaliza ba unidade auditória sosiál iha Gabinete PM ninia okos, nune’e bele imediata buka Xefe Governu ninia intervensaun liuhosi ministériu sira atu fó resposta ba dezafíu iha baze”, tenik Diretór FONGTIL, Daniel Santos, ba jornalista sira iha Palásiu Governu, kinta ne’e.

Alende ne’e nia mós informa sosiedade sivíl ne’e iha hamutuk 344, kompostu husi 300 iha nasionál no 44 iha internasionál, tanba ne’e tuir nia poténsia iha rekusu atu kontribui ba dezenvolvimentu, mesmu agora dadauk sira enfrenta hela rekursu finanseiru.

“Ami la’os mai atu husu maibé mai atu aprezenta ba governu hanesan orgaun ne’ebé importante”, tenik.

Nia dehan presiza mantein komunikasaun entre governu no sosiedade sivíl, tanba Xefe Governu alerta ona katak ema ne’ebé krítika ne’e mak hanesan amigu di’ak.

“Tamba ne’e mak ami mai salienta tan ida ne’e, reforsa tan katak ami bele halo servisu ho sosiedade sivíl hotu atu apoiu programa, polítika governu nian, liu-liu iha implementasaun”.

Biban ne’e, sira mós aproveita komprementa PM tanba asume ona kargu nu’udar Xefe Governu ba Goverrnu Konstitusionál daualu.

Nia mós akresenta sosiedade sivíl mós preukupa ho lei orgániku Governu Konstitusionál daualu nian, tanba ne’e sira aprezenta sira nia subvensaun balun no PM informa lei orgániku ne’e promulgadu ona husi Prezidente Repúblika (PR), tanba ne’e governu sei buka buka meius halo loos buat balun iha ninia implementasaun.

Kona-ba kestaun ne’e, Peskizadór La’o Hamutuk, Celestino Gusmão, realsa sira entrega ona karta ba PM no iha artigu ida mensiona kona-ba poder lisensiamentu fó ba Ministériu Petróliu no Minerais (MPM).

“Lisensiamentu ambientál antes ne’e iha diresaun nasionál ambiente nian, ne’ebé tuir ami di’ak tanba MPM mak nain ba projetu, sira defende projetu ida depois sira mak atu fó fali lisensa? Ne’e ladiak, tenke iha check and balance iha poder atu di’ak ba povu no estadu ba oin”.

Nune’e nia konsidera orgaun ida regula lisensiamentu ambientál ne’e tenke independente, labele tutela ba ministériu ida, se la’e iha konflitu interese. 

Jornalista: Julia Chatarina

Editora: Rita Almeida

HUSIK IDA HATÁN