Bankada CNRT: Estrutura Governu La Kompletu Implika Implementa Programa

0
152
Bandeira partidu CNRT. Foto espesiál

DILI, (TATOLI) – Xefe Bankada Partidu Kongresu Nasionál Rekonstrusaun Timor (CNRT-sigla portugés), Duarte Nunes, hateten bainhira membru Governu la kompletu, politikamente ninia implikasaun mak implementasaun programa governu.

“Fulan rua liu ona formasaun Governu Da-Ualu Konstitusionál seidauk kompletu no bainhira membru Governu la kompletu labele ho forma ida ne’ebé polítikamente responsável implementa programa Governu ba nia mandatu tinan lima, nune’e bele hakotu situasaun finanseira kesi kabun nian ne’ebé nasaun atravesa”, Duarte dehan bainhira reprezenta bankada CNRT fó sai deklarasaun polítika iha Sesaun Solene ba abertura Lejizlatura ba dalima iha Parlamentu Nasionál, segunda ne’e.

Nia hatutan se laiha nomeasaun indijitadu ba Governu, sei labele implementa ho seriedade no konsisténsia orsamentu jerál Estadu (OJE) aprovadu atu asegura finansiamentu ba despeza Estadu nian ho forma sistemátika, regulár no transparente.

Duarte realsa karik situasaun ne’e kontinua la’o, ida ne’e sei sai responsabilidade ba orgaun soberania sira hotu, tanba hakarak dada naruk impase polítika no la respeita ona vontade soberana povu nian.

“Bankada CNRT preokupa ba situasaun polítika ida ne’e, tanba se laiha solusaun maka bele afeta ba Estadu ida ne’e nia moris. Situasaun ida ne’e husu ba responsabilidade polítiku sira hotu atu hatudu prudénsia no onestidade”, nia sujere.

Bankada CNRT husu ba orgaun hotu-hotu atu hala’o nia kna’ar tuir de’it konstituisaun no lei sira no bankada CNRT sei kontra hahalok sira ne’ebé kontra prosedimentu legál.

Jornalista: Xisto Freitas

Editora: Rita Almeida

HUSIK IDA HATÁN