“Aprende Siénsia, Haburas Morál”

0
24
Universitáriu husi FMSS/UNTL hananu iha Tinan Biblia Família. Foto: Media Komunikasaun UNTL

DILI, (TATOLI) – Fakuldade Medisina, Siénsia no Saúde (FMSS), Universidade Nasionál Timor Lorosa’e (UNTL) liuhusi Asosiasaun Akadémika Estudantil (AAE) selebra tinan biblia família ho objetivu kria ambiente familiár ne’ebé iha unidade, solidariedade, dame no dialógu, promove Maromak nia futar lia, liuhusi lee biblia lorloron.

Nune’e mós, atu joven apostolu ba iha mundu teknolojia nian no haklaken valor Kristu nian ba ema seluk liuhusi tulun malu.

“Importánsia mak joven sira liliu estudante Fakuldade Medisina alende aprende siénsia sira mós tenke haburas mós sira-nia morál liuhusi atividade reliojioza para sira labele lakon espiritu servi iha komunidade. Joven mós presiza promove valór kristianidade”, dehan dekanu, João Martins, ba jornalista sira iha Kampus FMSS-eis SPK (Sekolah Pendidikan Keperawatan), Lahane-Díli, sesta lorokraik (28/9).

Dekanu FMSS katak estudante ne’ebé estuda iha área saúde no profisionál saúde dalabarak hasoru pasiente sira ho moras grave bele salva maibé balun iha faze terminál, fizikamente la biban salva.

Tanba ne’e importante mós pesoál saúde sira hala’o kna’ar kuidadu saúde kria komunikasaun di’ak ho padre kapelaun sira ka katekista sira hodi fó asisténsia espirituál ba pasiente sira hodi husik iis ho hakmatek.

“Pasiente sira ne’ebé ita labele salva fizikamente, sira husik vida, husik ho hakmatek i mós bele hetan salvasaun husi parte morál no parte salvasaun nian; sira bele hetan asisténsia relijioza”, dehan akadémiku UNTL ne’e.

Iha fatin hanesan, Prezidente Komisaun Organizadora Tinan Biblia Família, Teodora F. Boavida da Silva, akresenta importánsia husi selebrasaun ne’e mak bele halo ita hodi komprende lala’ok moris no oinsá moris tuir biblia nu’udar sarani.

Selebrasaun ne’e mós no hanesan sarani ita tenke hakbesik án ba Kristu. “Mensajen ba maluk joven sira, liliu ba ami saúde, lalika hadook áan husi Kristu maibé moris tuir Kristu nia hanorin no ajuda ema seluk tuir saida mak ita lee iha livru sagrada”, estudante FMSS, Teodora da Silva fó mensajen.

Eventu Tinan Biblia Família nu’udar atividade UNTL nian ida ne’ebé hala’o liuhusi Gabinete Pró-Reitór ba Asuntu Provedoria no Akonsellamentu ho implementa planu anual hodi hala’o talk show/ sorumutu kona-ba vida ispirituál no moris hanesan sarani no sidadaun ne’ebé mak di’ak hodi kontribui ba kreda nomós nasaun.

Vizaun husi Tinan Biblia Família mak hamutuk hanesan família ita hametin unidade hodi haburas no habelar pás no domin Kristu nian. Misaun mak UNTL serbisu maka’as hodi haklaken evanjellu iha mundu joven nian liuhusi sasin moris lorloron.

Eventu ne’ebé hala’o regularmente husi kada fakuldade sira, fulan ne’e FMSS nu’udar organizadór ho tema jerál katak Haklaken Evanjellu iha Mundu Joven nian Liuhusi Sasin Moris Lorloron.

Tinan Biblia Família iha FMSS bele la’o susesu tanba apoiu direta no indireta husi estrutura no estudante FMSS rasik inklui voluntáriu ka apoiu solidariedade husi pesoál interesadu sira balun.

Partisipa iha Tinan Biblia Família ne’e mak eis-vise-ministra saúde, Madalena Hanjam, Parlamentu Nasionál reprezenta husi deputadu Oscar de Araújo, padre kapelaun UNTL, padre Nívio Correia nomós konvidadu onradu sira seluk tan.

Jornalista: Rafy Belo

Editora: Rita Almeida

HUSIK IDA HATÁN