Aifaesa Husu Konsumidór Haree Validade Produtu

0
137
Produtu chiken nuggets traditional ho pezu líkidu 300 g ne’ebé iha evidénsia hatudu empreza halo falsifikasaun ba data expire. Foto/AIFAESA.

DILI, (TATOLI) – Autoridade Inspesaun no Fiskalizasaun Atividade Ekonómika no Sanitária (AIFAESA) halo inspesaun urjente ba supermerkadu Kmanek, tanba hetan reklamasaun husi konsumidór  kona-ba falsifikasaun data liu prazu ka expire ba produtu chiken nuggets traditional ho pezu líkidu 300 g no lataria sira, nune’e husu konsumidór atu haree validade produtu sira.

Koordenadór AIFAESA, Abílio Oliveira Sereno, informa supermerkadu ne’e foti presu foun no tau fali ba presu ida inválidu ona.

“Presu 2017 sira halo kópia auténtiku ba 2018. Falsifikasaun ne’e ita haree kuaze hanesan de’it 2017, sira halo ba 2018. Tuir informasaun, orijinál ne’e sira bá destroe tiha iha fatin seluk, to’o agora ami seidauk hetan, maibé inspesaun ho kooperasaun husi PNSIK para ajuda hodi haree no ha’u husu ba populasaun ka konsumidór hotu ne’ebé hetan produtu hanesan ne’e favór ida identifika no fó sai ba AIFAESA”, Abílio alerta ba públiku iha loja Supermerkadu ohin, bainhira halo inspesaun ne’e.

Koordenadór ne’e dehan la’ós, tanba atu hetan multa boot, maibé ba AIFAESA koima ladún signifika buat ida, mas hahalok halakon tiha presu loloos ne’e no tau fali foun ne’e maka todan tebes.

“Ha’u sei hetan evidénsia, prova loos ami sei haruka ba Ministériu Públiku para halo tuir lei ne’ebé vigora. Importante maka hatudu violasaun presu ida ne’e mak ami hakarak hatene loloos tanba (evidénsia) hatete loloos kedan mai husi armazein Kmanek”.

Data orijinál ba produtu ne’e.

Hatutan bainhira hetan sasán sira liu prazu ne’e sei todan liu tanba supermerkadu ne’e mak bosok fali konsumidór, inventa fali presu foun nune’e labele no tenke submete ba Ministériu Públiku para atua konforme lei ne’ebé vigora.

“AIFAESA sei buka nafatin, entertantu ha’u haruka ona ekipa operasaun konvoka Kmanek nia na’in hodi bá AIFAESA para responde perante akuzasaun ne’e. Tanba iha ne’e evidénsia presu orijinál ho presu falsifikadu. Kona-ba lataria sira ne’e hotu sira halo presu hanesan ne’e maka taka fali tiha iha expire nia leten”.

Nia hatutan tan: “Ne’e ami simu reklamasaun, ami lapara iha ne’e, sei buka to’o hetan. Ami hakarak hatene falsifikasaun ne’e, kompañia labele halo hanesan ne’e. Ita rasik maka halakon tiha presu orijinál tau fali falsifikadu ne’e ladi’ak”.

Tanba ne’e multa falsifikadu ki’ik liu ne’e $3000 no boot bele to’o $20.000 ou 30.000. “Maibé multa ne’e ladún signifikadu ba ami, iha kazu ida ne’e ami hakarak Ministériu Públiku identifika didi’ak, husu tanba sá maka sira iha intensaun falsifika fali presu”.

Data falsifikadu.

Tuir evidénsia ne’ebé AIFAESA hetan katak produtu chiken nuggets traditional ho pezu líkidu 300 g ne’e loloos nia data validade ne’e husi 02-02-2017 no expire iha 27-07-2018, entantu falsifika tiha no tau data foun ho nia validade 12-05-2018 no expire iha 15-05-2019.

Jornalista: Maria Auxiliadora

Editora: Rita Almeida

HUSIK IDA HATÁN