DILI, (TATOLI) – Delegasaun Unidade Misaun ba Dezenvolvimentu Ekonómiku Integradu Sub-Regional/TIA-GT (Timor-Leste, Indonesia, Austrália Growth Triangle) husi Timor-Leste sei partisipa enkontru iha Kupan iha loron 2 setembru, hodi ko’alia kona-ba preparasaun reuniaun trilaterál iha Austrália.
Xefe Unidade Misaun no Reprezentante Estadu, João Gonçalves, hatete sira nia parte hetan konvite husi Xefe Delegasaun Trilaterál Indonézia atu halo enkontru iha Kupan-Indonézia loron 2 outubru, nune’e iha loron 1 delegasaun sei desloka atu partisipa enkontru ho delegasaun Indonézia.
“Reuniaun ne’e ami bolu reuniaun interkalár hodi ko’alia kona-ba asuntu balun no prepara mós ba reuniaun trilaterál ne’ebé mak ami sei hala’o iha Austrália, ami hein sira atu fó loron loloos, tanba ne’e iha Kupan ami komesa ko’alia buat balun hodi aprezenta iha reunian trilaterál”, tenik ba jornalista sira iha Palásiu Governu, sesta (28/9).
Nia dehan reuniaun trilaterál iha ajenda atu ko’alia mak agrikultura, esportasaun karau ba Indonézia.
“Uluk ami ko’alia ona estabelesimentu korredór ekonómiku nian iha zona fronteira no agora Banku Dezenvolvimentu Aziátiku (ADB-sigla ingles), hanesan fasilitadór hodi halo estudu viabilidade ida no ami hein rezultadu husi estudu ne’e”.
Nia hatutan tan: “Iha mós husi Austrália fó apóiu liuhosi banku mundiál atu bele faan ita nia eletrisidade, tanba ita nia eletrisidade iha potensiál boot tebes no ita la uza tomak, entaun bele faan mós ba rai sorin (Indonézia)”.
Kestaun sira ne’e, nia dehan enkontru iha Kupang sei ko’alia kona-ba setór prioridade ne’ebé mak sei hili atu forma ekipa hanesan turizmu no aproveita mós oportunidade ne’e atu hasoru ho governadór foun.
Jornalista: Julia Chatarina
Editora: Rita Almeida