Ministru Obras Públikas, Salvador Soares dos Reis Pires. Imajen António Goncalves

DILI (TATOLI)— Ministru Obras Públika (MOP), Salvador Soares dos Reis Pires informa, MOP iha tinan 2019, estrada mak sai hanesan prioridade ba MOP nu’udar meius ida atu rezolve problema infraestrutura bázika.

“MOP hanoin katak ita tenta atu halo projetu la’ós iha munisípiu ida de’it, maibé ami tenta hare oinsá atu espalla projetu sira iha territóriu tomak, investimentu kapitál MOP iha área infraestrutura nian ba munisípiu hotu sein diskrimina balun, maibé ida ne’e hanesan esforsu”, Ministru Obras Públika, Salvador Soares dos Reis Pires informa hafoin hasoru malu ho Primeiru-Ministru (PM), Taur Matan Ruak hodi diskute konaba prioridade orsamentu ministériu no investimentu estratéjia sira.

Nia dehan tan, atu implementa prioridade ne’ebé iha ona sei utiliza orsamentu hosi fundu infraestrutura nó mós iha posibilidade ba fundus empréstimu.

“Ha’u nia parte halo hela estuda konaba estratéjia oinsá atu implementa planu mestre sira ne’e, sera que hanesan ho vizaun governu nia atu melhora sistema fornesimentu bee ba munisípiu sira”, nia dehan em relasaun ho problema bee mós, no iha ona estudu master plan ka viabilidade ida ne’ebé Banku Dezenvolvimentu Aziátiku (ADB-sigla iha ingles) halo ona.

Interesante liu tan mak nia dehan,   agora daudauk governu iha ona planu mestre ba munisípiu hanesan Same, Viqueque, Baukau no Lospalos nó mós Dili.

“Ida ne’e mak ita tenta hare hela, planu mestre hanesan ajuda husi ADB ba governu anterior, ha’u mós ko’alia ho sira atu dezenvolve tan planu mestre ba munisípiu seluk, no ba oin bele halo tan estudu viabilidade ba munisípiu seluk”.

“Ha’u nia parte buka meius oin-oin atu masimiza vantajen rekursu saida de’it mak disponivel atu ita komesa halo no implementa projetu fíziku ruma atu halo mudansa ba povu nia moris”, Salvador hakotu lia.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here