Prezidente Parlamentu Nasionál, Arão Noé de Jesus, simu Prezidente Repúblika, Francisco Guterres Lú Olo, iha uma fukun hodi loke kinta lejizlatura. Imajen António Goncalves

DILI (TATOLI) – Prezidente Parlamentu Nasionál (PPN) Arão Noé, lori Parlamentu Nasionál nia naran, agradese ba Prezidente Repúblika tanba  promulga ona Lei Orsamentu Jerál Estadu (OJE) 2018.

“Em nome Parlamentu, ha’u hato’o agradese ba Prezidente Repúblika tanba  ho promulgasaun orsamentu tinan 2018, ita hakotu ona rejime duodesimál ne’ebé ita moris durante fulan sia nia laran”, tenik ba jornalista sira iha Parlamentu Nasionál (PN), kinta ne’e.

Hodi hatutan, “ha’u hein katak iha tempu badak governu halo esforsu másimu para bele ezekuta, nune’e bele selu dívida no kompromisu sira ne’ebé halo, liu-liu direitu ba funsionáriu kontratatadu sira ne’ebé mak durante ne’e la simu osan no direitu legalias seluk ba estadu nia funsionamentu”.

Entretantu, Proposta Lei OJE 2018 husi governu ne’e aprovadu iha PN liuhosi votasaun finál global iha plenária sesta loron 7 Setembru ho rezultadu a favór 42, kontra 9 no abstensaun 14.

Total estimadu despeza ne’ebé VIII Governu Konstitusionál prevee iha tetu OJE 2018 hamutuk millaun $1.279, husi total ne’e salários no vensimentu millaun $200,312, bens no servisu millaun $421,666, ba transferénsia Públicas millaun 261,925, kapitál menór millaun $3,659, kapitál dezenvolvimentu millaun $392,037.

Hafoin halo redasaun finál ba Proposta Lei ne’e, iha loron 9 Setembru PN submete ba PR.

Nune’e iha loron 27 Setembru xefe estadu promulga Lei OJE 2018 ho montante millaun $1.277,4 hodi kobre despeza no reseita tinan 2018 tomak no hakotu rejime duodesimál.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here