Sekretáriu Ezekutivu Komisaun Nasionál Kombate HIV/SIDA, Daniel Marçal. Imajen Antonio Goncalves

DILI, (TATOLI) – Sekretáriu Ezekutivu Komisaun Nasionál Kombate HIV/SIDA, Daniel Marçal, hateten komisaun hakarak renova fali akordu prevensaun no kontrola virus HIV/SIDA iha fronteira ho Indonézia, ne’ebé antes ne’e iha ona maibé agora dadauk liu ona prazu.

“Atu husu Primeiru-Ministru nia observasaun uitoan kona-ba ita nia akordu uluk ho komisaun kombate HIV/SIDA Indonézia nian, la’os la halo maibé tanba ita iha mudansa polítika, entaun karta ne’ebé mak uluk pasa husi governu ne’e liu prasu ona, entaun ita labele uza ba oin”, katak nia ba jornalista sira iha Palásiu Governu, hafoin sorumutu ho Xefe Ezekutivu, sesta (28/9).

Nia hatutan: “Ami mai atu aprezenta, oinsá atu renova fali no haree husi parte legál nian. Xefe Estadu entende di’ak tebes, tanba antes ne’e komisaun servisu ona ho nia bainhira sei hanesan Prezidente”.

Nune’e mós nia dehan, relata situasaun jerál HIV-SIDA hanesan problema morál ne’ebé afeta tebes, liu-liu ba joven sira.

“Em jerál oinsá bele ajuda ita nia maluk ne’ebé sofre ona HIV/SIDA no oinsá halo prevensaun di’ak liu atu proteje populasaun, liu-liu joven sira husi problema no atitude sosial sira ne’ebé mak destroi sira nia futuru”, katak.

Tuir nia, Komisaun Kombate HIv/SIDA Indonézia nian mós hetan dezafiu hanesan Timor-Leste, liu-liu iha parte fronteira, tanba ne’e informalmente komisaun rua halo hela servisu maibé parte balun mak presiza legaliza ho akordu ruma para di’ak liu, tanba iha fronteira ne’e dala ruma ema husu fali akordu balun.

“Kontaktu ho Indonézia la’o nafatin husi parte NTT nian, mesmu akordu ne’e nia prazu liu ona, tanba ne’e ohin mai konsulta ho Primeiru-Ministru hodi konsulta ho parte legál saida mak presiza halo”, tenik.

Nia realsa nasaun rua tenke servisu hamutuk atu halo prevensaun. “Ita la’o uitoan, ha’u fiar loron ida ita bele rezolve, tanba HIV-SIDA ne’e mai husi ita nia án rasik, tanba ne’e presiza hasa’e ema nia konsiénsia atu ema ida-idak muda hahalok ne’ebé hanesan risku ba nia án rasik”.

Entretantu bazea dadus husi Ministériu Saúde nian to’o jullu tinan ne’e, rejista ona ema nain 798 mak sofre ona tanba HIV/SIDA.

Antes ne’e iha loron 28 marsu 2017, governu liuhosi desizaun Konsellu Ministru autoriza ona Komisaun Nasionál Kombate HIV/SIDA Timor-Leste asina akordu ho Komisaun Kombate HIV Indonézia hodi prevene no kontrola virus HIV iha fronteira.

Akordu ne’e atu haree de’it kona-ba serbisu hamutuk komisaun rua iha parte fronteira, hanesan Oekusi, Wini, Mota ain, Kefa, Salele, Tunu Bibi no inklui mos Atauru.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here