Ilustrasaun. https://www.pinterest.es/pin/817544138578175119/

DILI, (TATOLI) – Alumni Departamentu Dezenvolvimentu Komunitáriu, Fakuldade Siénsia Sosiál (FSS), Universidade Nasionál Timor Lorosa’e (UNTL), deputadu, Oscar de Araújo, hateten joven presiza promove espiritu sosiál no komunitáriu iha família komunidade no instituisaun sira ne’ebé hakna’ar án ba iha ne’ebé no bainhira de’it.

“Foinsa’e agora presiza halo nia istória rasik; iha komunidade, família, instituisaun. Tenke sai ezemplu ho siénsia sira ne’ebé mak hetan, mellora kreatividade no manifesta”, katak deputadu hosi bankada CNRT ne’e bainhira sai oradór ho tema Papel Joven ba Futuru iha eventu tinan Biblia Família iha Kampus FMSS-eis SPK (Sekolah Pendidikan Keperawatan), Lahane, sesta lorokraik (28/9).

Deputadu CNRT ne’e husu ba foinsa’e sira katak ho koñesimentu no kapasidade ne’ebé mak iha tenke fiar án; iha momentu ne’ebé no iha situasaun saida de’it ema nesesita, atu bele hakat karik presiza.

Nune’e mós tenke hasa’e inovasaun; iha buat balun ne’ebé iha komunidade laduun favorese ita tenke kontribui, muda, bele rezulta buat ne’ebé mak di’ak, valór ba komunidade.

Promove espiritu sosiál no komunitáriu; buat ne’ebé la halo, presiza hamutuk hodi halo. Labele taka matan ba serbisu sira ne’ebé presiza hela ita-nia tulun, katak tan deputadu ne’e.

Alumni UNTL ne’e mós konsidera joven pasadu no prezente diferente tebes, basá joven sira pasadu ne’e organizadu no krítiku tebes no nakonu ho sentimentu solidariedade.

“Joven iha ukun rasik án, seraké sei nafatin tuir mensajen sira ne’e? Joven prezente, tuir ha’u-nia haree defensivu barak, reasioner no emosionál tanba fásil monu ba globalizasaun tempu nian”, afirma.

Nia reforsa joven sira husi uluk to’o agora, istória mai no kontinua, nunka lakon iha istória mak 12 Novembru. Ne’e hanaran juventude nia kontribuisaun.

“Joven sira keta haluha ita-nia istória, momentu ida ne’e! ne’e ita deskreve direita papel juventude nian iha tempu ne’ebé mak tinan hirak liu tiha ona ba, ne’ebé bolu atensaun ba mundu nia matan hodi loke, hodi haree oinsá mak povu Timor nia situasaun, nia sofrimentu, husi loron ba loron, ema komesa hetan atensaun mai to’o situasaun ida ohin loron”, deputadu ne’e husu.

Papel Foinsa’e iha Futuru

Alumni UNTL ne’e akresenta papel joven ba futuru mak tenke nakonu ho nasionalizmu no patriotizmu; banati eroi sira-nia kontribuisaun hodi projeta ida ne’ebé mak di’ak liután.

Foinsa’e tenke sai ajente transformasaun, kontrolu sosiál, tenke sai forsa morál; iha kapasidade, integridade, karakter ne’ebé mak dinámiku no kreativu. Nasaun ida ne’e nia kontinuadór mak jerasaun foun.

Ba futuru, presiza dezenvolve juventude. Pozisaun tenke metin no kle’an iha família, komunidade no sosiedade. Haka’as án atu hetan futuru ne’ebé mak nakonu ho matenek iha ulun no fuan.

“Papel juventude ba futuru no ba destinu rai ne’e, povu, ba án rasik la’ós iha dosente no lideransa nia liman”, nia fó hanoin.

Maske nune’e, tuir nia sai reprezentante povu iha Parlamentu Nasionál (PN), liuhusi bankada CNRT ne’e katak sei iha dezafiu ne’ebé mak foinsa’e enfrenta ohin loron no futuru.

“Kompetitividade ita sei menus tebes, segundu problema ne’ebé ita hasoru ohin no ba aban mak ita-nia degradasaun morál; mudansa globalizasaun lori ita enfrenta ona situasaun ne’ebé mak presiza tempu atu hadi’a. Terseiru ita sei menus iha rekursu umanu”, konsidera deputadu Oscar de Araújo.

Tanba ne’e, dala ida tan, nia insiste foinsa’e agora presiza halo istória rasik, ho koñesimentu no kapasidade ne’ebé mak iha tenke ho fiar án hodi kontribui, halo inovasaun nomós promove espiritu sosiál no komunitáriu.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here