DILI, (TATOLI) – Prezidente Komisaun Funsaun Públika (KFP), Faustino Cardoso, hateten komisaun identifika ona funsionáriu públiku 10.455 sei tuir teste hodi hetan promosaun grau hosi G to’o A no eskalaun 1 to’o 7, tanba prenxe rekezitu hodi hetan promosaun iha 2019.
Tuir dadus KFP funsionariu permanente rihun 29 resin maka oras ne’e servisu iha administrasaun públika, rihun 13.636 tama kategoria rejime jerál maibé prenxe rekezitu ba promosaun rihun 10.455.
ʺKomisaun halo hela preparasaun hodi halo promosaun iha janeiru tinan oin ba funsionáriu públiku ho réjime jerálʺ, dehan Faustino hafoin relata preparasaun ne’e ba Xefe Governu, Taur Matan Ruak, iha Palásiu Governu, ohin.
Iha mós funsionáriu kontratadu hanesan ajente administrasaun públika rihun haat, pesoal kazuál rihun neen no seluk tan.
KFP oras ne’e implementa grau ba funsionáriu hahú ki’ik G, F, E, D, C, B no boot liu A, enkuantu ne’e progresu eskalaun hosi ida to’o hitu, automatikamente sa’e eskalaun bainhira hetan avaliasaun kada tinan hodi hetan muitu bom dala rua.
Promosaun ne’e sei halo ho teste depois konjuga ho kritéria seluk hanesan responsabilidade no kapasidade asume kargu, abilitasaun literária, avaliasaun dezempeñu, lokalidade servisu.
ʺSei iha teste la’ós automátiku, tanba sei hala’o iha fulan-janeiru to’o abril hodi konkluiʺ, afirma.
Jornalista: Agapito dos Santos
Editora: Rita Almeida
Deskulpa
Hau hanoin ami funsionarios nebe servico ho durasaun tempo nebe naruk tebetes.balun tinan 13,tinan 10,tinan,9…ne’e hau hanoin hasae ami nivel atomatikamente deit ona …la liu husi teste fali ona…..
Teste ne’e atu koko funsinario sr ni kakutak, balu keta error na karik,,,,,
Ho teste ida ne mak bele minimija sistema nebe ema barak hanaran familyarismu.
Teste ne diak Maibe la valoriza Ema dirasaun no esperiensia servisu, tanba balun 20 anus Mai kompete fali ho 4 anus antigidade