Progama Manajer MDI, Carolino Marques. Imajen Egas Cristovão

DILI, (TATOLI) – Mata-Dalan Institutu (MDI) ohin lansa relatóriu auditóriu sosiál ba implementasaun Projetu Programa Dezenvolvimentu Integradu Munisipál (PDIM) 2017 iha área infraestutura ne’ebé impementa iha  munisípiu Likisa no Manatutu.

Manajer ba Progama hosi MDI, Carolino Marques, hateten rezultadu auditóriu iha setór infraestutura bázika saúde, bee no saniamentu, rejista povu maioria asesu ona liuhosi implementasaun PDIM.

Sekretáriu Estadu Komunikasaun Sosiál, Merício Juvenal dos Reis Akara, ohin partisipa lansamentu relatóriu auditóriu sosiál hosi Mata Dalan Institutu iha salaun São Paulo Komoro. Imajen Egas Cristovão

ʺMaioria hosi projetu hirak ne’e benefisia ona povu, liuliu iha área saúde, saniamentu bee-moos, konstrusaun kapela iha munisípiu rua ne’eʺ, dehan nia ba Tatoli iha Salaun São Paulo II Komoro, ohin.

Mesmu nune’e hosi rezultadu servisu durante fulan neen rejista mós fallansu balun hanesan laiha partisipasaun komunidade ba projetu ne’e, laiha komunikasaun di’ak entre liña ministeriál ba implementasaun projetu, laiha estudu viabilidade kle’an no seluk tan.

Tan ne’e, MDI rekomenda ba Governu atu hadi’a fallansu hirak ne’e hodi promove no hametin transparénsia hodi apoiu prosesu dezenvolvimentu.

Sekretáriu Estadu Komunikasaun Sosiál, Merício juvinal dos Reis Akara, ne’ebé reprejenta Xefe Governu ba lansamentu ne’e hateten ezekutivu sei dezenvolve di’ak liután setór saúde tuir planu estratejiku dezenvolvimentu nasionál ba povu.

ʺGovernu sei garante prestasaun servisu di’ak liu iha setór saúde hodi promove efisiénsia, transparénsia no profesionalizmu iha jestaun, rekursu umanu, finanseira, infrastutura bázika no ekipamentu hotuʺ, dehan Akara.

Alende ne’e sei dezenvolve maka’as iha setór edukasaun atu ema hotu bele asesu ho kualidade, infraestutura bázika di’ak, edukasaun inkluziva ba ema hotu no setór sira seluk hanesan ekonomia, agrikultura no seluk tan.

Governu konsidera programa ne’e importante hodi garante transparénsia ezekusaun ba OJE ho kualidade ba povu nia moris di’ak.

ʺAtividade ida ne’e hodi bele sukat, análiza, avalia no relata implementasaun projetu sira ho intensaun atu hadi’a kualidade obra ne’ebé konstrui, tanba ne’e governu apresia servisu MDI ne’ebé apoiu onaʺ, tenik.

Governu promete sei uza relatoriu ne’e atu hadi’a politika ba dezenvolvimentu infraestutura bázika iha futuru.

Programa ne’e hetan apoiu orsamentu hosi Uniaun Europeia no servisu hamutuk ho Governu,  Fundasaun Ázia no FONGTIL.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here