Chief Executive Officer Telkomcel, Yogy Riskian Bahar, entrega lixeira ba Diretór Jerál Turizmu, José Filipe Dias Quintas. Foto/MTKI.

DILI, (TATOLI)-Operadór Telekomunikasaun Telkomcel iha loron mundiál turizmu ne’ebé monu iha 27 setembru ne’e apoia lixieru 20 hodi tau iha área Kristu Rei nian hodi fanun vizitante atu labele so’e lixu arbiru.

Jerente Konta Korporativa Telkomcel, Jennier Trindade, informa lixu fatin sira ne’e sei tau iha área rai-henek mutin, no dalan sira atu sa’e ba Kristu Rei no Dolok-One.

“Sei iha tan lixu ualu ne’ebé mak sei aumenta tan iha Kristu Rei ne’e’, Jennier hatete iha Kristu Rei ohin, bainhira halo limpeza hodi komemora loron mundiál turizmu nian hamutuk ho Ministériu Turizmu, Komérsiu no Indússtia no estudante husi Universidade Nasionál Timor-Lorosa’e (UNTL), Dili Institute of Technology (DIT), Universidade Orientál Timor Lorosa’e (UNITAL) iha departamentu turizmu nian.

Nia hatutan apoia ne’e halo tanba inisiativa husi ezekutivu Telkomcel nian ne’ebé haree katak iha fatin ne’e fo’er barak loos entaun ho lixeiru ne’ebé oferese ema bele so’e fo’er iha nia fatin.

“Ita-nia fatin turizmu ne’e tenke moos hodi atrai ita-nia turista sira ne’e. Ami ajuda liuhusi Ministériu Turizmu no hanoin iha futuru sei monta tan lixeira iha fatin públiku sira ne’e hanesan jardin Largo Lesidere, 5 de Maio atu nune’e ita-nia sosiedade ne’e so’e fo’er iha nia fatin atu kuidadu ita-nia ambiente ne’e moos netik hodi atrai turista sira mai”.

Lixu fatin ne’ebé fó ne’e modifika husi bidón kombustivel sira ne’ebé durante ne’e empreza uza hodi halo manutensaun ekipamentu serbisu nian. Husi asaun uzadu hirak Telkomcel halo resiklajen atubele uza fali hodi fó benefísiu ba komunidade.

Antes ne’e empreza oferese ona lixeira hamutuk 18 hodi tau iha sítiu turístiku Na’i-Feto Ramelau nian hanesan sentimentu responsabilidade atu ta-matan ba ambiente iha nasaun ne’e.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here