Foto/Google.

DILI, (TATOLI)-Ministériu Turizmu, Komérsiu no Indústria (MTKI) komemora loron mudiál turizmu ho limpeza jerál tanba durante ne’e isu boot tebes ne’ebé iha mak kona-ba lixu, entaun liuhusi asaun ne’e buka oinsá atu fó hanoin ba timoroan katak Timor-Leste iha poténsia turístiku no natureza ne’ebé furak tanba ne’e tenke hamoos no proteje nafatin.

Diretór Nasionál Planu no Dezenvolvimentu Turístiku MTKI, Edson Robert Noronha, hatete país ne’e iha poténsia ba destinu turístiku, maibé ambiente importante liu entaun tenke so’e lixu iha nia fatin para proteje ambiente ho nia natureza ne’e beleza nafatin.

“Ita bele dezenvolve fatin turizmu ne’e furak, maibé ita-nia ambiente nafatin ho lixu no agora ita haree iha fatin-fatin debate kona-ba lixu, entaun hodi atividade hanesan ne’e hamutuk ho parseiru dezenvolvimentu Telkomcel halo atividade limpeza jerál atu hatudu ba ema hotu katak importante mak ambiente ida saudavel no bele atrai turista mai”, Edson afirma iha Kristu Rei bainhira hala’o atividade limpeza iha ámbitu loron mundiál turizmu ohin.

Tanba ne’e iha loron mundiál turizmu nian fó hanoin importante ba ema hotu katak tenke kuida ambiente tanba lixu ne’ebé so’e arbiru nia impaktu ba saúde.

“Kuandu hakarak ambiente ne’ebé mak moos ita tenke so’e lixu ba iha nia nafatin, nune’e moris saudavel mai husi ita-nia an rasik”.

Aleinde ne’e sobre dezenvolve fatin turístiku iha Timor-Leste presiza iha planu ne’ebé di’ak atu nune’e liuhusi setór ne’e bele fó retornu ba nasaun aleinde husi fundu Mina-rai nian.

“Ita tenke iha planu ida ne’ebé integradu signifika tenke serbisu hamutuk ho liña ministériu sira hanesan husi parte turizmu nian bele ona dezenvolve fatin turístiku sira ne’e, maibé ita mós tenke hatene iha buat balun ne’ebé bele suporta ema atubele to’o iha fatin refere, ezemplu destinu turístiku ne’ebé furak, maibé asesu estrada laiha entaun ita presiza serbisu ne’ebé integradu mós ho liña ministériu seluk”.

Ho tema globál ba loron internasionál turizmu nian maka “turizmu transformasaun dijitál” no nasionál mak “dezenvolvimentu turizmu sustentavel” ne’e MTKI selebra hamutuk ho estudante husi Universidade Nasionál Timor-Lorosa’e (UNTL), Dili Institute of Technology (DIT), Universidade Orientál Timor Loros’ae (UNITAL) iha departamentu turizmu nian no Telkomcel hodi halo limpeza iha área rai-henek mutin, Kristu Rei no Dolok One.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here