Diretór Ezekutivu Telkomcel, Yogi Rizkian Bahar ho nia ekipa serbisu hasoru malu kortézia ho SEKOMS, Merício Juvinal dos Reis “Akara” iha Palásiu Governu. Foto TATOLI: António Gonçalves

DILI, (TATOLI)-Diretór Ezekutivu Telcomcel, Yogi Rizkian Bahar, informa ; hafoin hasoru malu kortezia ho Sekretáriu Estadu Komunikasaun Sosiál (SEKOMS), Merício Juvinal dos Reis “Akara” katak Telkomcel iha interese hakarak promove “Internet Saudável” iha Timor-Leste.

Internet dalaruma hanesan tudik ida, sorin kro’at no sorin lae, oinsá atu kulturiza internet saudável? Asesu informasaun pozitivu sira ne’ebé produtivu.

“Ida ne’e mós ami ko’alia ho sekretáriu estadu, nune’e ami serbisu hamutuk ho RTTL atu kria programa iha juventude, komunidade, eskola, universidade, oinsá internet saudável, tanba iha internet saudável produtividade sei aumenta. Ida ne’e kooperasaun ne’ebé ita harii dadaun,” informa diretór Yogi Rizkian Bahar, ba Ajénsia TATOLI, iha Palásiu Governu, Tersa lorokra’ik (25/09).

Diretór Yogi Rizkian Bahar haktuir katak Telkomcel iha kolaborasaun ne’ebé mak ekstraordináriu ho mídia sira ne’ebé mak iha Timor-Leste. Ida mak Telkomcel serbisu ho RTTL, engage (hola parte) programa mós ekstraordináriu

Serbisu hamutuk Telkomcel ho mídia no jornalista sira, tantu governu nian-RTTL (Rádiu no Televizaun Timor-Leste) nomós sira seluk inklui GMN (Grupu Media Nasionál), agora mós serbisu hamutuk dadauk ho TVE-televizaun edukasaun foun

Ne’e evidénsia katak Telkomcel suporta eh apoia mídia ne’ebé mak iha Timor-Leste. Tanbasá? Susesu nasaun ida nian, hakiduk ka ba oin mós determina husi mídia.

No, SEKOMS mós simu ho di’ak no presiza mós informasaun sira ka notísia pozitivu sira. “Ha’u mós hato’o katak Timor-Leste nu’udar mós fatin ne’ebé eksotiku. Katak, indústria turístika mak loloos ita tenke dezenvolve. No, dezenvolvimentu turístiku sei la dezenvolve bainhira la iha mídia,” informa diretór Yogi Rizkian Bahar.

Tanba ne’e, tuir diretór Yogi R. Bahar, SEKOMS mós espera halo engagement (parseria) oinsá fó sai notísia ne’ebé mak furak, nune’e turista sira sei mai iha Timor-Leste.

“Nune’e sei iha poténsia income (rendimentu). La’ós de’it ba prezensa turista sira nian maibé mós sosiedade  sira iha ita-nia leet; sira sei hola sasan, souvenir, ikus mai sei double impact (impaktu dobru) ba grupu ekonómia iha área refere. Ida ne’e mak ami hakarak serbisu hamutuk,” hateten diretór Telkomcel ne’e.

Terseiru, tuir tan Yogi R. Bahar ne’e, Telkomcel iha teknolojia video konferénsia. Katak, agora ho teknolojia distánsia hetok sai besik; la presiza viajen ho kustu ne’ebé karun maibé natoon de’it ho video konferénsia minutu lima, sanulu ka tolu nolu buat hotu ramata.

“Tanba ne’e ami mós fomenta atu uza teknolojia ida ne’e no ami iha solusaun. Ida ne’e mós ami ko’alia,” diretór Yogi R. Bahar fó razaun.

Ikus liu mak, diretór Yogi R. Bahar informa katak Telkomcel hakarak agradese ba SEKOMS tanba nia engagement boot la halimar ho sira. “Ami espera katak indústria mídia, sai indústria ne’ebé mak boot iha Timor-Leste,” espera diretór ne’e.

 Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here