Prezidente Tribunál Kontas hosi membru nasaun sira ne'ebé ko'alia lian-portugés sorumutu ho Primeiru-Ministru, Taur Matan Ruak, iha Palásiu Governu, kuarta, (26/9). Imajen António Goncalves

DILI, (TATOLI) – Prezidente Tribunal Kontas hosi Nasaun sira ne’ebé ko’alia lian-portugés (CPLP-sigla portugés), ohin hasoru Primeiru-Ministru, Taur Matan Ruak, hodi informa planu asembleia jerál Tribunal Kontas ne’ebé sei akontese semana ne’e iha Dili.

Prezidente Tribunál Rekursu, Deolindo dos Santos, ho Prezidente Tribunál Kontas hosi membru nasaun sira ne’ebé ko’alia lian-portugés. Imajen António Goncalves

Prezidente Tribunal Rekursu, Deolindo dos Santos, hateten inisia atividade ne’e ho vizita ba Prezidente Parlamentu Nasionál, Árao Noe, komisaun A PN no Xefe Governu rasik.

“Aban sei iha seminariu boot ida iha ótel turizmu ne’ebé sei involve mós entidade Estadu ne’ebé iha ligasaun ho ezekusaun orsamentu Estadu, atu rona servisu kamara kontas nian”, dehan juiz ne’e iha Palásiu Governu.

Durante asembleia jerál ne’e, Prezidente Tribunál Kontas sira sei define planu no programa ne’ebé sei implementa durante tinan rua ho asinatura deklarasaun Dili.

ʺIha ultimu maka sei hasai hamutuk deklarasaun ida sei tau naran deklarasaun Dili ne’ebé Prezidente Tribunal Kontas sira sei asina iha 28 setembru  lokraikʺ.

Nasaun membru CPLP ne’ebé sei partisipa iha atividade ne’e mak Angola, Brazil, Cabo-verde, Guine-Bisau, Guine Equatorial, Mocambique, Portugal, São Tome Princípe  no Timor Leste.

“Nasaun membru sira iha hotu no orsida Macau sei to’o mai, tanba involve mós Macau tanba ko’alia lian-portugésʺ, realsa.

Timor Leste sai membru Tribunal Kontas iha setimu asembleia Prezidente Tribunál Konta  iha Lisboa Portugal iha outobru 2012.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here