Majór Jenerál Lere Anan Timur

DILI, (TATOLI) – Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timor, informa dispozitivu forsa armada iha Timor laran tomak ba Prezidente Repúblika, Francisco Guterres Lú Olo.

“Ita haree katak ita nia forsa kuaze kolokadu iha Timor laran tomak, maske nune’e problema kontinua mosu, maibé ne’e la signifika problema ne’e grave liu”, Lere ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin enkontru ho Xefe Estadu Lú Olo.

“Ita nia forsa kolokadu iha postu sira ne’e, primeiru atu familiariza ho ita nia komunidade ka populasaun no segundu atu adapta án ba terrenu nu’udar militár”.

Nia haktuir uluk atu koloka forsa sira iha terrenu, ema barak kontra, tanba bele kria problema, maibé tuir komandu nia hanoin katak halo tiha problema maka foin bele revee.

Kona-ba kondisaun atuál forsa armada, Lere hateten sira iha planu ba médiu no longu prazu, maibé tenke konsolida buat ne’ebé iha dadauk. Pur-ezemplu, portu Hera ne’ebé ho kondisaun aat liu no Governu hanoin atu halo portu foun, maibé nia kestiona nusa la konsolida kondisaun ne’ebé maka iha depois hanoin harii portu foun.

“Se seidauk konsolida buat ne’ebé maka ita iha, nusa ita hakarak haksoit ba haksoit mai, ikus mai ita la halo buat ida”, realsa.

Nia hatutan forsa armada ne’e presiza buat rua de’it, maka hanesan kabun labele mamuk no osan ba família sira.

“Kareta iha ka laiha, kilat iha ka laiha, ami la preokupa. Ami preokupa de’it maka osan ba fén no oan no kabun bosu para órden tún ne’e kuandu la’o ain de’it mós tenke la’o”, eis Komandante Gerileiru afirma.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here