Eis Koordenadora Reforma Fiskál, Fernanda Borges. Imajen Egas Cristovao.

DILI, (TATOLI) – Komisaun Reforma Fiskál (KRF) liuhusi asisténsia Banku Dezenvolvimentu Aziátiku (ADB-sigla portugés) soru-mutu ho Ajénsia Públika Autónoma (APA) sira hodi ko’alia kona-ba prinsípiu halo polítika atu koleta taxa no enkargu.

Koordenadora KRF, Fernanda Borges, hatete liuhusi ajénsia no ministeriu ne’e sira-nia serbisu bele aumenta no sustenta Estadu nia gastu iha futuru.

“Liuhusi koleta reseita doméstika taxa no enkargu, ne’e maka ami hato’o ba sira ohin prinsípiu atu halo polítika ne’e, pós-prátika, ami hato’o mós informasaun balun ne’ebé ami foti husi sira-nia survey”, Fernanda afirma iha eis edifísiu Ministériu Finansa, ohin.

Nia hatutan tan: “Sira hato’o ba ami hodi sira komprende situasaun atuál, informasaun kona-ba lala’ok to’o agora no esplika halo oinsá mak atu kria baze legalidade, polítika ida di’ak, nune’e Parlamentu Nasionál bele aprova liuhusi Konsellu Ministru hodi instituisaun sira bele implementa ho di’ak”.

Borges hatutan ajénsia públika sira ne’e daudaun balun kobre ona reseita no balun seidauk, maibé uitoan-uitoan tama ona.

“Agora ita presiza hadi’a buat balun, presiza kria sistema, lei tenke hadi’a, polítika tenke klaru depois ita-nia tabela ba kustu mós tenke transparente, tenke iha sistema akontabilidade ne’ebé halo invoice atu resibu ne’ebé  di’ak atubele kobre husi populasaun ka empreza, sé de’it mak uza serbisu sira ne’e”.

Tanba ne’e presiza ko’alia ba malu, entende no oinsá mak atu hadi’a lei, sistema, regulamentu, formasaun ba ema ne’ebé presiza no halo pagamentu fásil ba povu.

“Tanba ema ne’e atu selu dólar 2 mak nia tenke halai tun to’o BNU atu selu ne’e susar atu hetan, tanba ema laiha tempu depois difisil, entaun ita buka meiu fásil ba povu selu para nia bele kontribui atu ita bele hetan ita-nia orsamentu ba serbisu sira ne’ebé Estadu presta, nune’e liberta uitoan fundu Mina-rai ne’e atu uza ba dezenvolvimentu, se la’e buat buat ki’ik-boot ita bá de’it fundu”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here