Ministru Obras Públikas, Salvador Soares dos Reis Pires. Imajen António Goncalves

DILI, (TATOLI) – Governu liuhosi Ministériu Obras Públikas, ohin halo ona pagamentu ho osan duodésimu hamutuk milliaun $4 ba kompañia Esperansa Timor Oan (ETO) hodi kontinua fornese kombustivel ba sentrál eletrika Hera.

ʺOhin konsege ona prosesu no ha’u hanoin ohin ETO asesu ona  pagamentu para selu taxa atu alfándega permite loke segel kombustivel para sustenta jeradór siraʺ, dehan Ministru Obras Públikas, Salvador Soares dos Reis Pires, hafoin aprejenta asuntu ne’e iha enkontru Konsellu Ministru iha Palásiu Governu, ohin.

Ho pagamentu ne’e kompañia sei sustenta kombustivel ba governu to’o fulan oin, tanba kombustivel oras ne’e destakadu ona iha sentrál Hera.

Alende ETO, kompañia SACOM Timor-Leste mós komprometidu sei fornese kombustivel litru milliaun tolu iha semana ida ne’e ba sentrál Hera.

ʺHa’u simu karta hosi sira (SACOM) katak hafoin fornese litru milliaun tolu, sei fornese barak liutánʺ, tenik.

Mesmu garante sei rezolve problema fornesementu kombustivel ba sentrál eletrika Hera no Betanu hodi kontinua fornese eletrisidade ba povu iha teritóriu.

ʺGovernu komprometidu tebes atu jere situasaun ne’e, tanba ne’e ami servisu maka’as para halo ida ne’eʺ, realsa.

Ministru ne’e esplika OJE 2018 MOP propoin milliaun $80 resin hodi selu divida ba fornesementu kombustivel, manutensaun jeradór sira, manutensaun liña eletrisidade no seluk tan.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here