CEO Telkomcel, Yogi Rizkian Bahar. Imajen TATOLI/António Gonçalves

DILI, (TATOLI) – Empreza Telekomunikasaun husi nasaun viziñu Indonézia, Telkomcel, ne’ebé hala’o operasaun iha Timor-Leste, nia traballadór maioria mesak Timoroan; na’in neen iha pozisaun estratéjika sira.

Ami halo capacity building (formasaun kapasidade) ho di’ak. Porsentu 92 husi ami-nia traballadór sira mak ema lokál, timoroan sira, até iha na’in neen tuur iha pozisaun natoon estratéjika agora; jestór sira iha ema timoroan”, informa diretór ezekutivu ka (Ceo-Chief Ezekutivu Officer) Telkomcel, Yogi Rizkian Bahar, ba Ajénsia TATOLI lorokraik ne’e iha Palásiu Governu, hafoin sorumutu ho Sekretáriu Estadu Komunikasaun Sosiál, Merício Juvenal dos Reis Akara.

Diretór ne’e katak Telkomcel selu impostu, kuaze dolár juta neen no sei kontinua selu to’o agora ba governu Timor-Leste. Hodi hatutan ne’e sei sai notísia di’ak  ba nasaun ne’e; sei iha kompañia ne’ebé kontinua investe.

“Ami mós hato’o ba sekretáriu estadu katak ami mós hasoru malu ona Primeiru-ministru, Taur Matan Ruak, no ko’alia ona hakarak halo investimentu”.

Yogi R. Bahar haktuir antes ne’e Telkomcel hato’o ona ba governu konstitusionál da-hitu, maibé ninia parte hakarak repete iha governu konstitusionál da-ualu.

Katak tan Telkomcel hakarak prosesu hotu la’o ho di’ak.

“Ami espera sei aprezenta mós iha Konsellu-ministru. Tanba ho investimentu fiber optica ne’e, presu internet sei tuun. Presu internet iha mundu, Timor-Leste mós inklui karun”.

Nune’e ho prezensa fiber optica kapasidade internet sei boot liutan, presu otomatikamente sei tuun; minímu. Tanba ne’e intensaun ekstraordináriu mak hatuun presu.

“Ha’u garante ne’e sei sai notísia ne’ebé di’ak, espesifikamente ba Timor-Leste. Tanba bainhira iha ona investimentu, ema seluk mós sei hakarak halo investimentu iha Timor-Leste”.

“Ami mós informa katak intensaun ida husi Telkomcel mak kontinua halo investimentu iha Timor-Leste”, reforsa Yogi Rizkian Bahar hodi konklui.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here