Transaporte aéreu hosi Indonézia, Transnusa ho númeru 72-600, tun iha Aeroportu Internasionál Prezidente Nicolau Lobato, Comoro. Imajen TATOLI/Egas Cristóvão

DILI (TATOLI) – Governu iha sesta loron 28 setembru ne’e, sei halo lansamentu voo internasionál dahuluk iha Aeroportu Internasional Suai Komandante em Xefe das Falintil Kayrala Xanana Gusmão.

Ministru Transporte no Telekomunikasaun, José Agostinho da Silva hateten ohin nia mai hasoru Primeiru-Ministr (PM), Taur Matan Ruak  hodi informa progressu servisu ministriu nian no preparasaun lansamentu voo internasionál dahuluk iha Aeroportu Internasionál Suai.

“Ohin mai halo audiensia ho Primeiru-Ministru, ho objektivu atu hato’o progressu servisu ministériu ninian no lliga ba preparasaun Aeroportu Internasionál Suai ne’ebé mak iha tempu badak Kompanhia Northern Oil & Gas Australia (Noga) husi Austrália, sira sei utiliza ita nia aeroportu”, tenik ba jornalista sira hafoin hasoru malu ho Xefe Governu iha Palásiu, ohin.

Governante ne’e informa,  loron 28 setembru agora sei halo voo internasionál dahuluk tamba durante ne’e Aeroportu Internasionál Suai fizikamente inagura ona, maibé durante ne’e uza deit ba nesesidade doméstika ninian mas ba internasionál nian seidauk.

Alende ne’e, nia dehan mós iha termu téknika preparadu husi parte Autoridade Aviasaun Sivíl Timor-Leste (ACTL-sigla iha portugués), Autoridade Navegasaun Administrasaun Timor-Leste (ANATL) no parte kompotente sira karantina, parte Ministériu Agrikultura no Peska, Alfándega no instituisaun sira ne’ebé mak relevante sira sei  desloka hotu ba Suai para halo preparasaun, hodi bele organiza aeroportu ne’e no kria kondisaun ruma bainhira kompanhia Noga atu utiliza.

Entretantu, Aeroportu Suai inaugura ona iha loron 20 juñu 2017 husi Prezidénte Repúblika, Francisco Guterres Lú-Olo.

Tuir komunikadu husi portal ofisiál governu, aeroportu ne’e rasik lokaliza iha munisípiu Kovalima, haleu besik kilómetru 15 hosi sidade Suai no iha pista ho luan 1.500 metrus no instalasaun ne’ebé modernu hodi simu pasajeiru sira no apóiu ba navegasaun nian.

Instalasaun ne’e maka inklui terminál foun, torre kontrolu, kuartel ba bombeiru sira, estasaun meteorolójika no elikópteru ne’ebé halo servisu evakusaun liuhosi ambulánsia aérea. Identifika ona iha Planu Estratéjiku Dezenvolvimentu Nasional 2011-2030, nesesidade atu haluan no rekupera fali pista antigu Suai nian no harii instalasaun foun no modernu sira.

Aeroportu ne’e permiti mós aumenta komunikasaun nasional no promove dezenvolvimentu ba kosta sul hodi apoia atividade sira ne’ebé iha relasaun ho petróleu no minerál, agrikultura, turizmu, saúde no seguransa.

Voo sira sei hala’o hosi Northern Oil & Gas Australia (NOGA) ba operasaun transporte ba rekursu umanu ba plataforma petrolífera no Tasi Timor. Kompañia Austrália ne’ebé simu ona autorizasaun espesiál ida hosi Autoridade de Aviação Civil de Timor-Leste (AACTL) hodi asegura, hadia daudauk ona kondisaun seguransa sira ne’ebé importante hodi realiza ligasaun entre Darwin no Suai.

Ligasaun ida-ne’e sei loke dalan atu empreza ne’ebé instala nia baze operasaun iha suai, favorese dezenvolvimentu ekonómiku ba rejiaun ne’ebá.

Aeroportu Internasionál Suai hahú konstrusaun iha loron 20 Maiu 2014 husi kontratór PT Waskita Karya (Persero),Tbk ho durasaun servisu loron 1.163 no hetan fiskalizasaun husi konsultan Jurutera Perunding Zaaba. Orsamentu ba projeitu ne’e rasik ho montante $67,691,189.85.

Iha loron lansamentu ne’e, sei loke nia voo internasionál dahuluk hodi simu aviaun ida ne’ebé sei semo mai hosi Darwin, Austrália.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here