Deputadu Partidu FRETILIN, Francisco Miranda Branco. Imajen Mídia Palásiu PR.

DILI (TATOLI) –Vise Xefe Bankada Fretilín, Francisco Miranda Branco liuhosi deklarasaun polítika iha plenária Tersa, ohin dehan Povu hakarak lider polítiku sira iha nasaun ida ne’e tuur hamutuk alias diálogu.

“Diálogu mak esénsia demokrasia, no se hanesan ne’e ona bainhira Timor-Leste hakarak duni hala’o demokrasia iha ita nia moris nasaun nian, tenke loke diálogu hodi ko’alia ba malu”, Branco bolu atensaun.

Hodi hatutan, diálogu loloos tenke hala’o iha klima boa vontade no komprensaun ba malu hodi ikus mai bele hamosu atendimentu di’ak  ba parte hotu.

Bainhira laiha boa vontade no komprensaun ba malu mak sei la iha diálogu hanesan agora daudauk akontese daudaun iha ita nia rai.

“Sei laiha diálogu, ita nia dezenvolvimentu sei la la’o ba oin”. Branco observa.

“Ita labele kontinua nafatin iha situasaun ida ne’e hodi taka diálogu ba malu, hodi ko’alia de’it ba malu liuhosi media sosiál, insulta malu liuhosi hakerek karta ba malu hodi hamosu tan konfuzaun no deskonfiansa, hodi la tau fiar ba malu. Nune’e falsidade ho ipokrizia mak sai baze iha ita nia relasionamentu umanu no polítiku.”

Iha fatin hanesan Deputadu Partidu Demokrátiku (PD), Adriano do Nascimento reforsa

“Ha’u hanoin dalan únika atu rezolve ita nia mak tuur hamutuk, liu-liu lider istóriku no fundadór nasaun sira tenke tuur hamutuk hodi loke dalan hodi hatudu dalan ba jerasaun foun atu la’o tuir.”

Tuir nia, demokrasia maioria iha kuantidade mós seidauk bele garante kualidade funsionamentu mákina estadu nasaun nian nó mós responde nesesidade povu nian.

Atu responde presiza tuur hamutuk mak bele responde problema komplikadu nasaun nian no povu nian.

Deputadu Bankada CNRT, Adérito Hugo, hamosu hanoin seluk katak, dialog bele maibé ne’e fora hosi  regra konstitusionál.

 “Sei ita kaer ona fora husi konstituisaun ita dehan tenke diálogu no tenke konsensu, entaun ita ignora hotu prinsípiu sira ne’ebé konstituisaun hakerek, artigu 70 konaba partidu polítiku hatete partidu polítiku mak órgaun konstitusionál ida iha devér atu kompete ba kargu polítiku sira liuhosi eleisaun la’ós liuhosi diálogu, sei diálogu mak solusaun ha’u sente problema ita bele rezolve impasse polítika 2017 ne’e buat hotu la’o ona”, Eis Prezidente Parlamentu ne’e argumenta.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here