Reprezentante Kaixa Inglaterra Rejiaun Bivaque, hasai foto hamutuk ho Prezidente Repúblika (PR), Francisco Guterres Lú Olo, hafoin enkontru ramata. Imajen Mídia PR

DILI (TATOLI)—Reprezentante Kaixa Inglaterra Rejiaun Bivaque, hala’o reuniaun ho Prezidente Repúblika (PR), Francisco Guterres Lú Olo, ho intensaun atu konvida Xefe Estadu ba vizita muzeu iha Aldeia Osoluga, Suku Samalari, Postu Administrativu Baucau Vila.

Muzeu Osoluga ne’e importante ba istória luta, fatin ne’ebé uluk saudozu Davida Alex Daitula, Mauhudo Ran Kadalak no Taur Matan Ruak helik án hodi luta kontra okupasaun Indonézia.

“Fatin ne’ebá ne’e iha nia istória balun ne’ebé timoroan sira labele haluha. Tan ne’e, presiza konserva halo didi’ak no atu konserva halo didi’ak tenke mai koordena ho entidade sira alta Estadu nian para bele haree,” reprezentante Kaixa Inglaterra Rejiaun Bivaque, José Manuel Nakfilak ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin hala’o enkontru ho Xefe Estadu Lú Olo.

Nakfilak haktuir, abrigu Osoluga nu’udar fatin ida ne’ebé sentrífuga, katak, hosi ne’ebá maka halo komprimentu ba rezolusaun ne’ebé sai atu halo espansaun ba rede klandestina tomak nomós hosi fatin refere mosu orientasaun atu harii rede klandestina iha Timor-Leste tomak no  asaun sira moris iha Dili laran iha tempu ne’ebá mai hosi Osoluga.

“Ita ko’alia kona-ba luta presiza iha rekordasaun ruma para hatudu dehan katak ne’ebá pasajen eroi ida nian, ne’ebá ita nia gerileiru ida ne’ebé uluk funu tebes haksumik án para halo funu ho nia ema sira,” nia tenik.

Ba konvite ida ne’e, Nakfilak informa, Prezidente sei aserta nia ajenda atu bele ba to’o iha fatin ne’ebá.

Abrigu ne’e, responsável sira ba kaixa hosi Fatumaca De Cima no Fatumaca de Baixo harii ona muzeu iha tinan neen liu-ba no agora sai ona hanesan turizmu komunitáriu ba turista nasionál no internasionál. Abrigu ne’e harii iha dékada 80 no sai FALINTIL nia helik fatin to’o funu ramata.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here