Diretór Jerál Estatístika Ministériu Finansas, Elias dos Santos Ferreira. Foto/MF.

DILI, (TATOLI) – Diresaun Jerál Estatístika Ministériu Finansas (MF) lansa ona Índise Presu Konsumidór (IPK) agostu 2018 ne’ebé hatudu katak presu merkadoria fulan refere iha deflasaun (tun) porsentu +0.2 kompara ho jullu tinan ne’e akontese inflasaun (sa’e) porsentu 0.1.

Diretór Jerál Estatístika, Elias dos Santos Ferreira, hatete deflasaun ne’e akontese tanba presu modo-tahan no foos lokál folin tun.

“Dalabarak ema dehan impase polítika ne’e bele afeta ba inflasaun no deflasaun iha país ida ne’e, maibé ha’u hanoin laiha. Ema ekonomista kuandu hatete osan sirkula iha merkadu barak sasán sa’e, maibé ita normál”, Elias afirma iha Kaikoli ohin, hafoin lansamentu IPK.

Hatutan sobre inflasaun ne’ebé akontese ne’e ba de’it tabaku no alkol. “Ita hatene katak sigarru no alkol ne’e folin sa’e, laiha ema ida hakilar, maibé kuandu foos sa’e hotu-hotu hakilar”.

Tuir nota imprensa nian sobre deflasaun (presu tun) iha agostu hetan kontribuisaun maioria husi grupu hahán no hemun (bebida) la’ós alkólika -0.3% ne’ebé hetan impaktu maioria husi sub-grupu vejetál -0.1%, masin-midar, marmelada, bani-been, xokolate, rebusadu -0.2% no produtu ai-han -0.2%.

Entantu iha sub-grupu ai-fuan +0.6% sai hanesan mudansa konstráriu ba grupu hahán no hemun la’ós alkólika.

“Mudansa persentajen anuál sa’e +2.7% kompara fulan-agostu 2018 ho agostu 2017, hetan kontribuisaun husi grupu hahán no hemun la’ós alkólika +1.8%, alkol no tabaku +10.7%, edukasaun +16.6%, transporte +3.9%, uma +1.5%, roupa no sapatu +0.5%, rekreasaun no kultura +0.6% no komunikasaun +0.5%”.

Inflasaun tradeable (negosiavel) tun -0.3% (hanesan mudansa presu produtu hotu ne’ebé iha dependénsia maka’as ba kompetisaun merkadu internasionál) no non-tradeable (hanesan mudansa presu produtu hotu ne’ebé iha dependénsia ba fatór merkadu doméstiku) sa’e +0.1% iha mensál kompara agostu 2018-jullu 2018.

Inflasaun tradeable +0.3% no non-tradeable sa’e +2.0% iha anuál kompra agostu 2018-agostu 2017.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here