Ministra Finansa em ezersisiu, Sara Lobo Brites. Foto António Goncalves

DILI, (TATOLI) – Payroll (lista salariál) Ministériu Finansa (MF) hetan problema ba pagamentu saláriu funsionáriu sira iha ministériu no instituisaun hamutuk 10, tanba identifika saláriu negativu, nune’e sei halo pagamentu iha faze daruak nian no ba ministériu ne’ebé laiha problema sei simu sira-nia direitu dentru semana ne’e.

Ministra Finansa en ezersísiu, Sara Lobo Brites, informa ministériu barak maka hetan saláriu negativu tanba ne’e maka payroll lakonsege lori tempu para halo ajustamentu.

“Hakarak informa ba ita-boot sira ne’ebé mak saláriu fulan-fulan negativu iha orsamentu 2019 ne’e tau osan natoon para labele fó prejuízu fali ba iha pagamentu saláriu”, Sara aviza iha sesaun traballu sobre distribuisaun pakote fiskál 2019 ohin, iha Aitarak-Laran.

Ministériu ne’ebé hetan saláriu negativu maka husi Gabinete Primeiru-Ministru (GPM), Prezidénsia Konsellu Ministru (PKM), Sekretáriu Estadu ba Igualdade no Inkluzaun, Sekretáriu Estadu Formasaun Profisionál no Empregu (SEFOPE), Ministériu Edukasaun, Ministériu Agrikultura no Peska (MAP), Ministériu Solidariedade Sosiál no Inkluzaun (MSSI), Ministriu Turizmu, Ministériu Obra Públika no Komisaun Nasionál Eleisaun (CNE-sigla iha portugés).

“Pur tantu ne’e mak ministériu ne’ebé maka fulan-fulan payroll hasoru problema hela de’it”, katak.

Nune’e iha okaziaun fahe pakote fiskál 2019, Ministra Finansa husu diretór sira atu halo mapeamentu ida di’ak uitoan hodi tau osan natoon hodi labele implika ba pagamentu.

“Ba ministériu sira ne’ebé ha’u informa ita-boot sira-nia saláriu hela ho segunda faze tanba labele hein fali ita-boot sira hotu-hotu lasimu fali saláriu”, dehan.

Diretór Jerál Finansas Estadu MF, Januário da Gama, informa situasaun ida ne’e (saláriu negativu) akontese tanba dalabarak iha planu orijinál iha orsamentu nian talvés iha alokasaun balun ne’ebé lasufisiente iha divizaun no departamentu balun no bele mós tanba iha mobilidade funsionáriu husi diresaun ida bá seluk ne’ebé tenke halo pagamentu ba iha funsionáriu sira ne’e, entaun hamosu défisit orsamentu iha divizaun balun.

“Nune’e diresaun jerál tezouru komunika ona ba ministériu no instituisaun hamutuk sanulu ne’e hodi rezolve imediata, halo transferénsia orsamentu ka ajustamentu ruma para bele fó biban ba Ministériu Finansa hodi halo kalkulasaun ba iha segunda faze, nune’e funsionáriu sira iha ministériu sanulu ne’e bele simu sira-nia direitu dentru fulan-setembru”.

Januário espera bainhira ministériu no instituisaun sira halo ajustamentu ba orsamentu lalais no sei bá iha Diresaun Orsamentu Estadu para halo ezersísiu lalais maka sei responde iha fulan ida ne’e nia laran no ba instituisaun ne’ebé laiha problema iha semana ida ne’e hetan ona sira-nia saláriu.

Jonalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here