Diretora Caucus, Paula Corte-Real, ba jornalista sira iha Fatuhada, ohin. Imajen Egas Cristovao

DILI, (TATOLI) – Organizasaun Feto Caucus oferese formasaun sensivel jéneru ba jornalista nasionál sira durante loron tolu, hahú ohin to’o 27 iha Tower Fatuhada.

ʺFormasaun ida ne’e la’ós atu hanorin (jornalista) sira, maibé buka estratéjia hosi formadór sira ba jornalista sira atu hato’o informasaun ba públiku, loke sira nia hanoin kona-ba sensibilidade jéneruʺ, dehan Diretora Caucus, Paula Corte-Real, ba jornalista sira iha Fatuhada, ohin.

Partisipante formasaun mai-hosi RTTL,EP, GMN, STL, Jornal Independente, Radiu Komunidade no seluk tan.

Paula hateten formasaun ne’e atu hakbiit koiñesementu iha kobertura ba asuntu feto, promove hodi partisipa iha vida polítika, sai lideransa, asume knaar importante iha instituisaun Estadu no privada.

Tuir observasaun organizasaun feto sira nota, durante ne’e mídia sira ladun halo kobertura ba asuntu sensibilidade jéneru.

Mesmu ne’e, nia parte rekoñese kontribuisaun jornalista sira, tanba halo kobertura no fó reportajen di’ak ba asuntu feto.

ʺHo formasaun ne’e, espera mídia liuhosi jornalista sei fó kolaborasaun di’ak liután ho organizasaun feto sira oinsá promove maluk feto siraʺ, tenik nia.

Sekretáriu Estadu Komunikasaun Sosiál, Merício Juvinal dos Reis Akara, iha abertura hateten formasaun ne’e sei apoiu jornalista sira atu promove senbilidade jéneru hodi partisipa iha vida polítika, ekonómia no seluk tan hodi dezenvolve Nasaun.

ʺLori governu nia naran katak ita sei apoia movimentu ba igualdade jéneru para evita violénsia doméstikaʺ, dehan Governante.

SEKOMS iha programa importante, sei isentiva jornalista feto atu aprende sai xefe redasaun no seluk tan iha instituisaun mídia sira hodi promove di’ak liután igualdade jéneru liuhosi kobertura no publikasaun.

ʺIta hanoin atu fó mos bolsu estudu ba jornalista sira hodi aumenta kapasidade kleanʺ, realsa tan.

Programa seluk mos sei servisu hamutuk ho organizasaun feto hodi promove igualdade jéneru iha mídia.

Xefe Tékniku ba Asesoria Projetu Eleitorál Programa Nasoen Unida ba Dezenvolvimentu (PNUD), Andréas de Castillo Sánches, hatutan programa ne’e hetan apoiu fundu hosi Governu Japaun no Korea, implementa hosi PNUD ho organizsaun feto Caucus.

PNUD sei servisu hamutuk ho organizsaun feto sira hodi promove di’ak liután sensibilidade jéneru.

Oradór sira ba formasaun ne’e mak Prezidente Konsellu Imprensa (KI), Virgilio Guterres, ho topíku Etika Profesionalismu Jornalista, Komisária Komisaun Funsaun Públika, Maria Domingas Alves, ho topíku Polítika Abordajen Integradu ba Jéneru no oradór seluk tan.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here