Ministru Reforma Lejislativa no Asuntu Parlamentár, Fídelis Magalhaẽs. Foto Egas Cristovao

DILI, (TATOLI) – Ministru Reforma Lejislativa no Asuntu Parlamentár, Fídelis Leite Magalhães, hateten bankada parlamentár presiza iha konsertasaun (akordu), relasiona ho eleisaun Komisáriu Komisaun Anti Korrupsaun (KAK) ne’ebé oras ne’e dadauk iha ona ajenda maibé seidauk bele realiza.

“Prosesu ne’e iha termu polítiku Parlamentu Nasionál (PN) nian, governu labele komenta, tanba hanesan prosesu ida ne’ebé mak ezije entre bankada sira tenke halo konsertasaun ba malu”, katak ba jornalista sira iha uma fukun, ohin.

Nia espera PN bele halo prosesu ne’e ho di’ak no tuir tempu para bele prenxe lakuna (fatin mamuk) ne’ebé mak agora dadauk iha KAK.

Tuir governante ne’e kada orgaun bele iha hanoin la hanesan, maibé tenke tetu buat hotu ho di’ak, tanba ne’e ba governu la’ós konsidera ida ne’e hanesan la-respeitu ba desizaun.

“Governu konsidera ida ne’e hanesan prosesu institusionál demokrátiku ne’ebé la’o dadauk no sira tenke aprosima malu no espresa sira nia pontu de vista (hanoin) kona-ba konkorda ou la’e ne’e buat normal, ita tenke hakiak buat ne’e hanesan kultura ida”, katak.

Nia dehan tan governu halo ona ninia knaar, se kuandu PN la-konkorda bele informa fali ba governu, hafoin haree saida mak sei halo ba oin.

Eis deputadu lejislatura dahaat ne’e akresenta parte governu seidauk hetan desizaun ruma husi PN, inklui informasaun finál husi Prezidente Parlamentu Nasionál (PPN) kona-ba kandidatu Komisáriu KAK foun ne’ebé tuir konsensu bankada sira nia.

“Se iha ona desizaun ruma mak komunika mai governu no governu sei halo saida mak presiza halo. Governu iha duni vontade atu halo ho lalais para prosesu ne’e bele la’o ba oin. Ita hotu hein, presiza konsertasaun entre bankada sira, tanba iha ne’e PN mak halo polítika”, dehan.

Entretantu, mandatu ba komisáriu KAK, Adérito Pinto Tilman, ba tinan haat termina ona iha loron 15 jullu 2018.

Nia eleitu hosi PN ba komisáriu KAK iha loron 15 jullu 2014 hodi troka Aderito de Jesus Soares, ne’ebé asume kargu ne’e iha 2010.

Iha loron 11 jullu, Governu liuhosi enkontru Konsellu Ministru deside aumenta tan mandatu tinan haat ba komisáriu KAK, Aderito Pinto Tilman, hosi períodu 2018 to’o 2022.

Maibé iha loron 16 jullu liuhosi sesaun plenária, PN suspende eleisaun ba komisáriu KAK ho razaun kandidatu labele mai ho lista únika no tenke iha opsaun.

Nune’e liuhosi reuniaun KM iha loron 20 jullu, Primeiru-Ministru (PM), Taur Matan Ruak, aprezenta tan proposta hodi aumenta kandidatu Komisáriu KAK. Nune’e kandidatu ne’ebé sei kompete iha eleisaun ne’e mak Sérgio Hornai no Adérito Pinto Tilman.

Iha loron 24 setembru, ajenda plenária ne’ebé tuir loos iha eleisaun ba komisáriu KAK, tenke adia ba-dalimak nian, tanba la-prenxe korum deliberasun tuir ezijénsia lei KAK nú.8/2009 15 jullu artigu 7 kona-ba komisáriu tenke prenxe uituan liu 3/4 ka 49 deputadu prezente.

Deputadu opozisaun sira, liu-liu bankada FRETILIN maioria la-marka prezensa iha plenária ba eleisaun komiáriu KAK ho razaun kandidatu tenke konsensuál.

Vise Xefe Bankada FRETILIN, Francisco Miranda Branco, antes ne’e hateten bankada hakarak figura ba komisáriu KAK tenke konsensuál, maske propoin husi governu no deside husi PN.

“Hotu-hotu tenke tur hamutuk ba interesse Estadu nian iha luta kontra korupsaun, tanba figura ne’ebé aprezenta mós husi bankada FRETILIN la simu, entaun ami hanoin presiza iha kandidatu foun. Ami sei hili kandidatu ne’ebé mak hanesan tuir lei haruka, konviniente husi majistradu juiz sira ka husi ministériu públiku”, katak.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here