Ministru Reforma Lejislativa no Asuntu Parlamentár, Fídelis Magalhaẽs. Foto Egas Cristovao

DILI, (TATOLI) – Ministru Reforma Lejislativa no Asuntu Parlamentár, Fidelis Leite Magalhães, hateten Governu Konstitusionál daualu bele rekore automátika ho orsamentu duadésimu tuir rejime duadesimál.

“Rejime duadesimál permite governu bele rekore automatikamente. Ida ne’e la hanesan ho milliaun $140 ne’ebé husu autorizaun hosi parlamentu. Maibé ida ne’e la’e, osan sei iha kofre, entaun governu bele aplika regra ne’e hodi finansia funsionamentu mákina Estadu”, Ministru Fidelis Magalhães ba jornalista sira iha Parlamentu Nasionál, ohin.

Tanba ne’e governu deside ona atu rekore fali ba rejime duadesimál ka dotasaun temporária ho montante milliaun $80 resin. Hosi osan hirak ne’e atu orsamenta ba saláriu no vensimentu inklui ba nesesidade imediata.

Nune’e, husu ba funsionáriu sira katak kalma nafatin, tanba governu sei halo jestaun ho di’ak, maibé espera katak Orsamentu Jerál Estadu (OJE) 2018 sei hetan promulgasaun hosi Xefe Estadu, Francisco Guterres, iha tempu badak.

Parte seluk mós governu sei esforsu atu haruka OJE 2019 mai parlamentu tuir kalendáriu ne’ebé iha maibé mós dalaruma sei iha alterasaun ruma, tanba sei hein promulgasaun OJE 2018.

“Ami koko atu hatama OJE 2019 mai iha 15 outubru, dalaruma sei iha alterasaun ruma, tanba tempu ne’e apertadu loos ho situasaun OJE 2018 ne’ebé ita hein”.

OJE 2019 ne’ebé atu submete ba parlamentu ho platfon billiaun $1.3 no sei aloka ka kontinua ba programa konstrurasaun ba infraestrutura, edukasaun, saúde, agrikultura no seluk tan.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here