La Prienxe Kuorum , PN Adia Eleisaun Komisáriu KAK Ba Dalimak

DILI (TATOLI) – Ajenda Plenária segunda ne’ebé tuir los iha eleisaun ba Komisáriu Komisaun Anti Korrupsaun (KAK), tenke adia ba dalimak tanba  la prienxe kuorum deliberasaun tuir ezijénsia Lei KAK nú.8/2009 15 jullu artigu 7 konaba Komisáriu, ne’ebé tenke prienxe oituan liu 3/4 ka 49 deputadu prezente.

Prezidente Parlamentu Nasionál (PPN) em ezersísiu, Angelina Sarmento hateten ida ne’e ajenda ba dalimak ona atu halo votasaun ba Komisáriu KAK, maibé la prienxe kuorum, liu-liu parte Bankada fretilín mak la hola fatin.

“Infelizmente husi parte opozisaun, liuliu Bankada Fretilín dala lima ona la marka prezensa iha votasaun atu bele funsionaliza fali Komisáriu Komisaun KAK ne’ebé mak oras ne’e vakum hela. Ita labele avansa ba ajenda eleisaun Komisáriu KAK, ajenda ida ne’e bele muda fali ba plenária aban”, tenik iha plenária  ohin.

Hodi informa plenária tenke prienxe kuorum ne’ebé rekere husi Lei KAK nian, ne’ebé tenke prezensa ne’e tenke iha 3/4, rekere 49 deputadus atu bele prosede ba votasaun.

Vise Xefe Bankada Partidu Libertasaun Populár (PLP), Francisco Vasconcelos hateten konaba ajenda Komisáriu KAK, nia rasik lamenta tebes Parlamentu Nasionál (PN) hanesan reprezentante povu ne’ebé tau konsiderasaun ba asuntu sira ne’ebé importante ligadu ba nasaun nian, maibé ikus mai deputadu opozisaun sira laiha konsiderasaun no sentidu estadu.

“Hotu-hotu hakarak kombate korrupsaun mas realidade lako apoiu KAK hare komisáriu sira ne’ebé toma konta ba asuntu hodi kombate korrupsaun, parte hanesan PN mós obriga ajenda ida ne’e hodi ajenda beibeik to’o dala lima ona mas la iha rezultadu, to’o bainhira mak ita bele realiza ajenda ida ne’e? Iha parte seluk ita hotu konsidera katak Komisáriu KAK ne’e importante tebes no nu’udar instituisaun estadu hodi kombate korrupsaun”, nia lamenta.

Hodi haktuir, “Proposta Lei KAK mós aprezenta ona ba komisaun A ona, maibé eleisaun komisáriu dala barak ona ita husik de propózitu, nia intensaun saida? Tanba  ne’e mak nia lamenta tebes atitude sira ne’e tanba  laiha sentidu estadu, laiha kontribuisaun hodi luta kontra korrupsaun ba rai ida ne’e”.

Parte seluk, Xefe Bankada Fretilín, Aniceto Guterres ba jornalista sira hateten, Bankada Fretilín sei aprezenta no haruka direita ba governu lista kandidatu komisáriu KAK kuandu hetan kandidatu tuir kritériu.

“Kandidatu KAK ami seidauk hetan no seidauk identifika, sei hetan ona ami sei haruka direita ba governu, tanba  tuir lei governu mak tenke propoin. Kritériu ba kandidatu ne’e tenke la’o tuir lei haruka”, tenik ohin.

Antes ne’e Vise Xefe Bankada Fretilín, Francisco Miranda Branco hateten Bankada Fretilín hakarak figura ba Komisáriu KAK tenke konsensuál, maski propoin husi governu no deside husi PN.

“Hotu-hotu tenke tuur hamutuk ba interese estadu nian iha luta kontra korrupsaun, tanba  figura ne’ebé aprezenta mós husi bankada Fretilín la simu, entaun ami hanoin presiza iha kandidatu foun.  Ami sei hili kandidatu ne’ebé mak hanesan tuir lei haruka, konveniente husi Majistradu Juis sira ka husi Ministériu Públiku”, katak.

Hodi informa, Kandidatu komisáriu KAK ida agora rezigna an ona no agora falta kandidatu ida mesak, tanba ne’e Bankada Fretilín sei aprezenta kandidatu foun ida para iha consensus entre parte hotu no bele avansa figura ida di’ak liu atu lori polítika kontra korrupsaun ba oin.

Entretantu, mandatu ba komisáriu KAK, Adérito Pinto Tilman ba tinan haat remata ona iha loron 15 Jullu 2018. Nia eleitu hosi PN ba komisáriu KAK iha loron 15 Jullu 2014 hodi troka Aderito de Jesus Soares ne’ebé asume kargu ne’e iha 2010.

Iha loron 11 Jullu, Governu liuhosi enkontru Konsellu Ministru deside prolonga tan mandatu tinan haat ba Komisáriu KAK, Aderito Pinto Tilman, hosi períodu 2018 to’o 2022.

Artigu 7 Lei KAK nia haktuir, PN mak hili Komisáriu, tuir proposta hosi Governu, liuhosi Deputadu sira nia votu maioria absoluta, hosi sira ne’ebé marka prezensa uitoan liu, ka haat tolu (3/4) hosi Deputadu sira ne ́ebé hala’o hela sira nia funsaun, no simu pose iha PPN nia oin.

Komisáriu KAK nia knaar mak: dirije atividade Komisaun nian, halo buat hotu no dilijénsia hirak ne’ebé kompeténsia Komisaun nian iha ámbitu prevensaun kriminál nian, nune’e mós halo rekomendasaun no elabora relatóriu sira, Koordena hahalok sira no dilijénsia investigasaun kriminál ne’ebé haknaar ba Komisaun.

Nune’e mós fahe ba pesoál tékniku investigadór, prosesu inkéritu no atus ne’ebé Ministériu Públiku delega, ka juis haruka, iha ámbitu prosesu judisiál, kontrola legalidade hahalok sira no dilijénsia prevensaun no investigasaun kriminál nian ne ́ebé Komisaun halo, asegura koordenasaun pesoál tékniku investigadór ho autoridade judisiál sira, asegura koordenasaun Komisaun ho órgaun polisia kriminál sira seluk.

Ikus liu mak halo rekrutamentu ba tékniku investigadór no pesoál apoiu sira seluk, tuir define ona iha lei, hala’o kbiit dixiplinár ba pesoál ne ́ebé serbisu ba Komisaun, elabora relatóriu anuál kona-ba atividade Komisaun nian, liu-liu kona-ba númeru intervensaun sira ne ́ebé iha prosesu inkéritu, hodi aprezenta ba PN no ezerse kompeténsia hirak seluk tan ne’ebé lei atribui.

Komisáriu rasik, bele delega ninia funsaun sira ba ninia adjuntu sira, ne ́ebé bele sub-delega, la halakon nia kbiit atu foti fila fali funsaun ne’e bainhira de’it no la bele delega podér sira ne’ebé uza ba fó orientasaun sira ne’ebé hamosu hahalok ne’ebé interfere direitu ba privasidade ka liberdade pesoál indivíduu ida, podér halo rekomendasaun no relatóriu sira.

Jornalista: Julia Chatarina

Editór : Manuel Pinto