Foto/Google.

DILI, (TATOLI)-Diretór Jerál Komérsiu Ministériu Turizmu, Komérsiu no Indústria (MTKI), Leovigildo dos Santos, informa fundu dezenvolvimentu ba negosiante ho montante rihun $500 husi Programa Nasaun Unida ba Dezenvolvimentu hein atu ezekuta de’it.

Maibé antes atu realiza fundu ida ne’e presiza iha akordu foun tanba antes ne’e Governu asina ho PNUD iha 2015 mate ona.

“Ministériu presiza atu asina fali akordu foun ho UNDP depois ministériu mós asina fali akordu ida ho BNCTL atu tau hela nia rekizita balun iha ne’ebá, hela ida ne’e mak seidauk mas nia progresu ne’e ita bele dehan porsentu 70 la’o ona no agora oinsá para aselera”, Leovigildo katak iha Bebora, ohin.

Nia esplika bainhira akordu ne’e Governu reprezenta husi eis Ministru Komérsiu, Indústria no Ambiente, Constâncio Pinto, asina hamutuk ho PNUD iha altura ne’ebá, fundu ne’e labele ezekuta kedan tanba presiza halo tan fali akordu ida ho Banku Nasionál Komérsiu Timor-Leste (BNCTL-siga iha portugés) nune’e afeita uitoan.

“Iha momentu ne’ebá mós ministru Constâncio nia mandatu kuaze atu hotu ona entaun afeita ba orsamentu ida ne’e atu ezekuta”, katak.

Tanba seidauk ezekuta maka MTKI téknikamente aselera atu fundu ne’e bele hasai ho akordu foun ne’ebé sei halo no informa ona ba xefe gabinete Ministru Prezidénsia Konsellu Ministru, Agio Pereira, para hatene prosesu sira ne’e. “Pelu menus lansa akordu ne’e depois bele tun bá baze tanba hakarak ka lakohi osan ne’e tenke sai”.

Ministériu daudaun ne’e prepara hotu ona giaun no hein konfirma ho BNCTL tanba Komérsiu mak tau nia kritériu sira ne’e para hasai osan tuir komérsiu nia rekomendasaun.

“Orsamentu ne’e ita sei foka liu ba mikro pekena empreza sira ne’e para sira bele asesu. Ita hanoin katak esperiénsia pasadu sira ne’e labele akontese entaun giaun tenke di’ak ho nia rekizitu iha ne’ebé ema tenke priexe, ita lafavorese ba família, lafavorese ba kolega”.

Hatutan atu osan ida ne’e bele utiliza ho di’ak husi empreza ki’ik sira maka tenke tau kritériu rigorozu no MTKI, PNUD nomós BNCTL bele serbisu hodi halo steering committee para serbisu própriu ba ida ne’e to’o momentu fiskalizasaun ba atividade sira ne’ebé maka sira halo husi orsamentu ida ne’e.

Diretór Ezekutivu Servisu Rejistrasaun no Verifikasaun Emprezariá (SERVE), hatutan akordu ne’e uluk asina husi eis Ministru Constâncio Pinto, PNUD, SERVE no Banku Sentrál Timor-Leste iha Governu anteriór maka labele la’o bá oin, nune’e sei halo fali alterasaun.

“Akordu ne’e sei lori bá BNCTL tanba nia mak sei ezekuta. Parte SERVE nia fó hatene ba parte relevante katak ho situasaun ida hanesan ne’e ita tau kritériu sira ne’ebé kaman, maibé rigór nune’e ita-nia negosiante sira bele asesu ba fundu ki’ik ida ne’e hodi bele dezenvolve sira-nia atividade ekonómika atu labele depende liu ba orsamentu jerál Estadu”.

Jornalista : Maria Auxiliadora

Editór : Manuel Pinto

Lee mós :

Governu Ho Ninia Parseiru Sei Lansa Fundu Dezenvolvimentu Ba Negosiante

 

HAKEREK NO HATÁN

Please enter your comment!
Please enter your name here