Prezidente Parlamentu Nasionál, Arão Noé. Imajen António Goncalves

DILI (TATOLI) – Prezidente Parlamentu Nasionál, Arão Noé, esplika VIII governu bele foti tan osan hodi sustenta mákina estadu, sein autorizasaun hosi Parlamentu Nasionál (PN) tanba kofre estadu sei iha osan. Husu autorizasaun ba PN bainhira kofre estadu mamuk.

Governu atu foti osan duadésimu ne’e iha dalan tanba kuandu kofre Estadu sei iha bele uza, kuandu kaixa Estadu mak mamuk ona governu tenke husu mai hodi foti osan hosi fundu petrolíferu,” Arão Noé esplika ba jornalista sira iha PN, foin lais.

Nia dehan, kofre Estadu sei iha restu hosi osan U$ 140 millaun ne’ebé natoon foti, hanesan mós impostu ne’ebé daudaun ne’e iha, nesesidade Estadu nia bele uza hodi atende funsionamentu mákina Estadu nian liuliu atu kobre ba bens servisu, saláriu no vensimentu ba funsionáriu sira.

Tan ne’e la presiza haruka mai parlamentu tanba ida ne’e lei fó dalan. osan ne’e iha ona kofre Estadu, kuandu ba foti osan hosi fundu petrolíferu mak tenke hetan autorizasaun hosi parlamentu.

Hatán kona ba Prezidente Repúblika veta ou promulga Orsamentu Jerál Estadu 2018 Nia dehan, “Ha’u hasoru malu ona ho Prezidente Repúblika, maibé dehan sei estuda, no tuir konstituisaun mós ba prezidente nia tempu durante loron 30 nia laran.”

Maski nune’e nia hatutan, difikuldade ba Estadu mak kuandu uza nafatin osan duadésimu mak sei fó impaktu ba situasaun ekonomia, finanseiru rai laran inklui pagamentu ba kompañia sira.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here