Embaixadór Timor-Leste ba Nasaun Kuba, Loro Horta, hasoru Prezidente Repúblika, Francisco Guterres Lú Olo, hodi informa situasaun estudantes timoroan ne’ebé hala’o estudu iha Kuba no situasaun polítika. Imajen mídia PR

DILI, (TATOLI) – Embaixadór Timor-Leste ba Kuba, Loro Horta, segunda ne’e, iha Palásiu Prezidente Nicolau Lobato, Bairru Pité, enkontru ho Prezidente Repúblika, Francisco Guterres Lú Olo, hodi relata situasaun polítika foun iha Kuba.

Loro Horta haktuir tinan ne’e (2018), Prezidente Kuba, Miguel Mario Diaz-Canel Bermudez, asumi lideransa Governu Kubanu, iha ne’ebé rotan ukun ninian Prezidente Raul Castro entrega ba nia iha 19 abril liu, ba tanba Raul Castro nia idade avansadu ona.

Mudansa polítika foun ne’e, tuir nia, la fó impaktu ba kooperasaun entre Kuba no Timor-Leste, maibé hametin liu-tan nasaun rua nia kooperasaun ba futuru no konfirmadu katak Primeiru Vise Presidente Kuba sei vizita Timor iha tinan oin (2019).

Nia mós informa ba Prezidente Repúblika kona-ba situasaun estudante timoran ne’ebé hala’o sira nia estudu iha área medisina espesialista no pedagojia iha Kuba laiha problema, disiplina barak ka komportamentu di’ak kompara ho estudante timoroan sira iha nasaun seluk.

Loro haktuir estudante timoroan ne’ebé foti medisina iha ema na’in 36 no pedagójika iha na’in 25 no realsa importante teb-tebes Timor tenke hametin kooperasaun ho Kuba iha área medisina no área seluk.

“Timor agora iha médiku barak maibé laiha espesialista, pur-ezemplu radiojolisista, farmásia no tékniku laboratóriu, ne’e duni presiza hametin kooperasaun di’ak ho Kuba para bele lori timoroan sira atu hasai medisina espesialista”.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here